Sýretti túsirgen – Erlan OMAR, «EQ»
Búginde áıelder qaýymy otbasynyń berekesin kirgizip qana qoımaı, elimizdegi aýqymdy ózgeristiń bel ortasynda júr. Qoǵam ómiriniń barlyq salasynda zor tabysqa qol jetkizip, kóshbasshylyq qasıetterimen tanylyp keledi. Eń bastysy – sanaly urpaq tárbıelep, ulttyq qundylyq pen salt-dástúr, ádet-ǵurpymyzdyń saqtalýyna ólsheýsiz úles qosyp otyr.
Memleket basshysy Qasym-Jomart Toqaev atap ótkendeı: «Áıel jany qashanda ádemilikke jaqyn. Arýlarymyz álemge súıispenshilikpen qarap, jan-jaǵyna jaqsylyq sharapatyn syılap júredi. «Áıel bir qolymen besikti terbetse, bir qolymen álemdi terbetedi» degen sóz beker aıtylmaǵan. Áıel – shańyraqtyń shyraǵy, ulttyń uıytqysy. Ana – tirshilik pen berekeniń bastaýy, adamzat boıyndaǵy bar izgiliktiń qaınar kózi. Ananyń aıaly alaqany men sheksiz meıirimi ár úıge jylylyq beredi. Salt-dástúrimiz ben ana tilimizdiń búgingi kúnge jetýi de – eń aldymen, analardyń arqasy».
Qoǵamnyń órkenıettiligi onyń áıel-analarǵa degen qurmetimen, qamqorlyǵymen ólshenedi. Anany ardaqtaý – halqymyzdyń qanyna sińgen qasıet. Degenmen qazirgi jahandaný men naryq zamanynda qurmet naqty áleýmettik qorǵaý tetikterimen kórinis tabýǵa tıis. Búginde ana men bala quqyǵyn qorǵaý, demografııalyq-áleýmettik máselelerdi sheshý memlekettik saıasattyń basym baǵytyna aınaldy. Elimiz – áıelder men balalar quqyqtaryn qorǵaý jónindegi halyqaralyq konvensııanyń tolyqqandy múshesi. Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa turaqty jumys isteıdi. Eńbek jáne halyqty áleýmettik qorǵaý, Oqý-aǵartý, Densaýlyq saqtaý mınıstrlikteri tarapynan keshendi sharalar júzege asyrylyp keledi. Elimizde 150-den astam úkimettik emes áıelder uıymy belsendi qyzmet etip jatyr. Túrli jaǵdaıǵa baılanysty ana men bala quqyǵyn qorǵaýǵa baǵyttalǵan zańnamalar ýaqyt talabyna saı úzdiksiz jetildirilip otyrady.
Áıel-anany qoldaý – bul jaı ǵana áleýmettik kómek emes, memlekettiń bolashaǵyna quıylǵan eń qomaqty ınvestısııa. Qoǵamdaǵy árbir ana erteńgi kúnine senimmen qarap, ózin memlekettiń qorǵaýynda ekenin sezingende ǵana ultymyzdyń irgesi berik, rýhy bıik bolady.
«El bolamyn deseń, besigińdi túze» deıdi halyq danalyǵy. Al aq besiktiń ıesi – áıel-ana ekenin eskersek, qoǵamymyzdyń keleshegi, elimizdiń damýy ardaqty analarǵa baılanysty. Ardaqty analarymyzǵa, aıaýly qyz-kelinshekterimizge Jaratqan ıeniń nury jaýsyn, áıel-ananyń qajyry men qaıraty, rýhy men jigeri, názik sezimi men bıik parasaty máńgi jasaı bersin. Barshamyzdy árdaıym Ana qudireti jelep-jebep júrsin!
