Turǵyn aýdannyń ózi de oblys ortalyǵynda jańadan boı kótergen. Munda negizinen memlekettik baǵdarlama arqyly salynǵan úıler bolǵandyqtan, aýdannyń turǵyndary da negizinen jastar. Jańa mektepke tek osy turǵyn aýdanda turatyn balalar keldi. Birinshi qyrkúıekte mektepke 800 bala qabyldandy. Birinshi synyptyq búldirshinder 7 synypqa toptastyryldy. Bilim uıasynyń ashylý saltanatyna oblys ákiminiń orynbasary Marat Júndibaev qatysyp, ustazdar men shákirtterdi, ata-analardy bilim merekesimen quttyqtady.
«Qazaqta 7 sany qasıetti bolyp sanalady. Bilim uıasynyń tabaldyryǵyn endi attaǵan búldirshinder 7 synyptyń partasyna otyrady. Mektepke tarydaı bop kirgen balalar, taýdaı bop shyqsyn, sanaly azamat bolyp, sapaly bilim alsyn» dedi Marat Qonysbaıuly.
Jańa mektep zamanaýı talaptarǵa jaýap beredi. Munda bilim alý jáne bala tárbıesi úshin barlyq jaǵdaı bar. Sport zal, eńbekke baýlý páni ótetin sehtar, tipti olarda saz balshyqtan qumyra jasaıtyn stanoktarǵa deıin bar. Al mundaı sehtar oblystaǵy ózge mektepterde áli bolǵan emes.
Mektep №29 aralas orta mektep bolyp tirkeldi. Onda ınklıýzıvti synyp ta bar. Múmkindigi shekteýli balalar erekshe, arnaıy baǵdarlamamen, tıýtorlardyń daıyndaýymen oqıtyn bolady. Bul da oblys mektepterinde áli engizilmegen erekshelik. Mundaı balalar úshin mektepte lıft de jumys isteıdi.
Bilim mekemesiniń qurylysyna bıýdjetten 1 mıllıard 700 mıllıon teńgeden asa qarjy jumsaldy. Ata-analar mekteptiń saltanatty ashylýynan keıin onyń ishin aralap kórdi.
Qostanaı
