El esinde saqtalǵan derekterdi ekshegende Áliptomardyń Qyzyljar óńiriniń týmasy ekendigi aıtylady. Bosaǵasyna bereke baılanǵan, myńdy aıdaǵan jylqyly baı bolsa kerek-ti. Jaı ǵana myńǵyrǵan malyna, kúpsigen baılyǵyna mastanǵan jan emes, rýhanı baılyqty da esinen shyǵarmaǵan zerek jan eken. Sypa boıyn ǵana emes, rýhanı jan dúnıesiniń de kirshiksiz bolýyn armandap ótken Áliptomar barynsha taqýa adam bolǵan desedi. Musylmannyń bir paryzyn ótemek bolyp, janyna úlken ulyn ertip qajylyq saparǵa attanǵan. Biraq bul dúnıedegi pendeniń oıyna alǵan ońdy isi ońynan ońǵaryla bergen be? Uly sapardyń besinshi kúni aıaq astynan syrqattanyp, topyraq Qorǵaljyn aýdanynyń Abaı aýyly mańynan buıyrypty.
El aǵalary ómirden ótken adamnyń mán-jaıyn, saparynyń mánisin bilgen soń qurmet kórsetip, arýlap, jer besikke tapsyrǵan. Arada biraz ýaqyt ótken soń artta qalǵan el-jurty jınalyp kelip, taqýanyń basyna mazar turǵyzady. Mazardy salý úshin osy óńirde kóp kezdesetin usaq tastardy paıdalanǵan. Berik bolsyn dep jylqynyń qylyn aralastyryp, ósimdik tamyrlarynyń qospasyn quıyp, kirpish soqqan. Shıki kirpish bolsa da búginginiń otqa kúıdirilgeninen kem emes. Bálkim artyq. Al syry – qupııa. Saıyn dalanyń azynaı soqqan jeli men Arqanyń aq jaýynyna shydap áli tur. Áli de talaı zaman shydaıtyn túri bar. Bir ereksheligi, kúńgirt jáne ashyq tústi kirpish almastyrylyp, kezektesken tártippen qalaǵan. Osy tásildiń ózi ózgeshe reń berip tur.
Búgingi zamanda Áliptomar taqýanyń jambasy jerge tıgen jer dinı ǵıbadat orny bolyp sanalady. Basyna kelip minájat etken jan baılyqtyń murat emes, jan tazylyǵy men arly adaldyqtyń máńgilik serik ekendigin uǵynady. Eńseli mazar el rýhynyń bıik ekendigin meńzep tur.
Aqmola oblysy,
Qorǵaljyn aýdany
