Tuńǵysh ret uıymdastyrylǵan bul forým Azııa qurlyǵynda ornalasqan elder arasyndaǵy ádebı-mádenı baılanystardy nyǵaıtý, ádebı úderistiń damýyna qatysty Azııa elderimen tájirıbe almasý syndy birqatar maqsat-mindetterdi kózdeıdi.
Bul týraly Qazaqstan Jazýshylar odaǵynyń tóraǵasy Ulyqbek Esdáýlet brıfıngte aıtty. «Ońtústik Koreıa, Qatar jáne Mońǵolııa elderinen Nobel syılyǵyna 3 nomınant kele jatyr. Qurlyqtaǵy 45 memlekettiń 44-inen jazýshy shaqyrdyq. Nátıjesinde 35 elden 80-ge jýyq qalamger kelmek. Uıymdastyrý jumystaryna memleket ózi qoldaý kórsetip otyr. Memlekettik hatshy Marat Tájın myrza sharany uıymdastyrýǵa tikeleı atsalyssa, Memleket basshysy forýmnyń ashylýyna qatyspaqshy. Osynyń ózi ádebıetke degen oń kózqaras qalyptasqanyn kórsetedi», – dedi Ulyqbek Esdáýlet. Mádenıet jáne sport vıse-mınıstri Nurǵısa Dáýeshov atalmysh forýmdy 3 jylda bir ret ótkizý usynylatynyn aıtty. «Azııa qalamgerlerine osy forýmdy 3 jyl saıyn ártúrli memlekette ótkizýdi usynbaqpyz. Sondaı-aq, Azııa jazýshylary komıtetin quryp, shtab-páterin Nur-Sultan qalasynda ashýdy josparlap otyrmyz. Aýdarma isine, sonyń ishinde qazaq avtorlaryn Azııa tilderine aýdarý boıynsha da naqty usynystarymyz bar. Forým barysynda osy taqyryptarda pikir almasyp, kelissózder júrgizemiz», – dedi vıse-mınıstr.
Qazaqstan Jazýshylar odaǵy tóraǵasynyń orynbasary Aqberen Elgezektiń sózinshe, ádebı shara barysynda paıdaly dárister men ashyq pikirtalastar josparlanǵan. «Forým jumysy 3 kúnge sozylady. Erteń plenarlyq otyrysy ótedi. Eki bólimde 11 spıker baıandama oqıdy. Kelesi kúni TED.9 formatynda arnaıy shara ótedi. Onda 10 spıker dáris oqyp, erkin formatta suhbattasady. Sondaı-aq, Abaı kóshesiniń boıynda «Qalamgerler alleıasy» ashylmaq. Onymen qosa Ortalyq Azııa qalamgerleriniń kezdesýi ótedi. Forým sheńberinde jas Azııa qalamgerleriniń kezdesýi de josparlanǵan», – deıdi ol.
