Memleket basshysy Qasym-Jomart Toqaevtyń Qazaqstan mashına jasaýshylarynyń VII forým qatysýshylaryna quttyqtaý hatyn sharanyń ashylýynda kómekshisi Máýlen Áshimbaev oqydy.
«Qurmetti forýmǵa qatysýshylar, sizderdi Qazaqstan mashına jasaýshylarynyń VII forýmynyń ótkizilýimen quttyqtaımyn! Qazirgi ýaqytta mashına jasaý salasy qosalqy bólshekterden bastap joǵary tehnologııalyq zamanaýı jabdyqqa deıin kóptegen ónim shyǵarady, ol sondaı-aq teplovozdardy, jolaýshylar men júk vagondaryn, júk jáne jeńil avtomobılderin, transformatorlardy, sondaı-aq basqa da kúrdeli jabdyqtardy shyǵarady. Mashına jasaý búkil qazaqstandyq ekonomıkanyń damýyna yqpal etetin sala bolyp tabylady. Qazaqstan mashına jasaýshylarynyń VII forýmynyń qatysýshylaryna jemisti eńbek jáne alǵa qoıǵan maqsattaryna qol jetkizýde jetistikter tileımin» delingen Prezıdenttiń quttyqtaý hatynda.
Forýmdy Qazaqstan Respýblıkasy Úkimeti jáne «Atameken» UKP qoldaýymen Indýstrııa jáne ınfraqurylymdyq damý mınıstrligi men Qazaqstan Mashına jasaýshylar odaǵy uıymdastyrdy.
Bıylǵy forým «Mashına jasaý – Qazaqstandy ındýstrııalandyrý draıveri!» taqyrybynda ótip jatyr.
Forýmǵa 1000-nan astam delegat, jetekshi qazaqstandyq jáne álemniń 20-dan astam elinen mashına jasaý kásiporyndarynyń basshylary, ortalyq memlekettik organdar, kvazımemlekettik sektor, damý ınstıtýttary, bıznes qaýymdastyqtar jáne mashına jasaý ónimderiniń iri tutynýshylary qatysyp jatyr.
Sondaı-aq forým alańynda mamandandyrylǵan mashına jasaý kórmesi jumys isteıdi.
