«Sońǵy jyldary mashınajasaý salasynda turaqty ósim baıqalyp otyr. 2018 jyldyń qorytyndysy boıynsha mashına jasaý óndirisiniń kólemi alǵash ret 1 trln teńgeden asty (1 089,8 mlrd teńge)», — dedi vıse-mınıstr.
2019 jyly joǵarǵy ósim dınamıkasy saqtaldy. 2019 jyldyń 8 aıynyń qorytyndysy boıynsha mashına jasaýda óndiris kóleminiń ósýi ótken jyldyń osyndaı kezeńimen salystyrǵanda 18% qurady. Sala qurylymynda mashına jasaýdyń qosalqy salalarynyń ishinde kóbirek ósim dınamıkasyn avtomobıl jasaý kórsetip otyr (NKI – 156,5%). Búginde Qazaqstanda avtokólik quraldarynyń barlyq sanattarynyń óndirisi júrgizilýde. Elimizde 167 avtomobıl modeli qurastyrylady, onyń ishinde 39 jeńil kólik modeli, 22 álemdik brend bar.
Sonymen qatar A. Erjanov eki besjyldyqta avtomobıl jasaý Qazaqstannyń mashına jasaý salasynyń draıverleriniń birine aınalǵanyn aıtty. Iri torapty qurastyrýdan (DKD) usaq torapty qurastyrýǵa (CKD) kóshý qolǵa alyndy. Mysaly, shanaqtardy dánekerleý men boıaý boıynsha tehnologııalyq operasııalar engizildi.
Sonymen qosa, A. Erjanov elektrotehnıkalyq mashına jasaý sektoryna nazar aýdardy, bul sala mashına jasaýdaǵy basqa setkorlarmen salystyrǵanda, asa turaqty óndiris dınamıkasymen jáne óndiristiń tereńirek jergiliktendirilýimen sıpattalady. Sektordaǵy iri oıynshylar — Qaınar-AKB, Alageum Electric, Kazsentrelektroprovod, Kazenergokabel basym bóligi eksportqa ketetin básekeli ónimder shyǵarady.
Qazaqstandaǵy temirjol, aýyl sharýashylyǵy, taý-ken jáne munaıgaz mashına jasaýda otandyq kásiporyndar elektrovozdar, lokomotıvter, vagondar,tutas taptamaly dóńgelekter, traktorlar, kombaındar, aýyl sharýashylyǵy tehnıkalaryn, munaı servıstik kompanııalar men jer qoınaýyn paıdalanýshylar úshin túrli jabdyqtar shyǵarady.
Atalǵan salalar óndiriste robottandyrylǵan dánekerleý keshenderin (Indýstrııa 4.0 elementterin) paıdalanýmen sıpattalady. Salanyń kórnekti mysaldary:
«Prommashkomplekt» JShS, «Qazaqstan Agro Innovasııalyq Korporasııasy» JShS, «Meıker» JShS, «Jigermunaıservıs» JShS, «О́skemen armatýra zaýyty» AQ jáne t.b.
Sonymen qatar A. Erjanov jýyrda ótken VI Mashına jasaýshylar forýmynda Mashına jasaýdy damytýdyń keshendi jospary talqylanǵanyn aıtty. Osy talqylaýlardyń qorytyndysy boıynsha 2019-2024 jyldarǵa arnalǵan QR Mashınajasaý salasyn damytýdyń jol kartasy ázirlendi, ol QR Premer-Mınıstriniń ókimimen bekitildi.
Salalardy odan ári damytý maqsatynda Jol kartasynda mashına jasaý kásiporyndaryn qoldaýdyń naqty sharalary men birqatar mindetter qarastyrylǵan.
«Memleket men bıznestiń yntymaqtastyǵy tabysty bolǵan jaǵdaıda josparlanǵan mindetter iske asyrylyp, Qazaqstannyń mashınajasaý salasy odan ári damýy úshin jańa ıdeıalar kóteriledi dep úmittenemiz», — dep túıindedi A. Erjanov.
