Teńiz qoltyǵyndaǵy qarapaıym «Qaratereń» aýylynan 25 ushqysh shyqqan eken, sol abzal aǵalary sekildi Manastyń da mejesi bıik bolatyn. Sol mejesi degenine jetti.
Ol Aral qalasyndaǵy №13 orta mekteptiń túlegi. Qazaqy tárbıeden shyqqan talantty ul Aqtóbe qalasyndaǵy áýe-qorǵanys kúshteriniń áskerı ınstıtýtynda oqyp, «Ushý apparattaryn paıdalaný. Maıdan avıasııalyq-komandalyq taktıkasy» mamandyǵyn aldy. Sóıtip Shymkent qalasyndaǵy 55652 áskerı bólimine ushqysh bolyp ornalasty. 2008 jyldan beri oqý-jattyǵýda ábden shyńdalyp, kásibı maman dárejesine kóterilgen. Mine, sonyń nátıjesi azamattyń abyroıyn asqaqtatty.
Reseıdiń Rıazan qalasynda ótken Halyqaralyq armııa oıyndaryna ár memlekettiń sarbazdary jınaldy. Olar áskerı ushaqty ıgerýdegi myqtylyǵy men eptiligin synǵa saldy. Maıor Manas Dáýletbaev Qazaqstan quramasynyń sapynda óner kórsetti. Manas jalǵyz emes, janynda áriptesi Dmıtrıı Korobkın bar. Bularǵa berilgen tapsyrmanyń biri – fızıkalyq daıyndyq, pılottyq tehnıkany jáne nysanaǵa dál soqqy jasaý men joǵarǵy aerobatıkany kásibı sheberlikpen oryndaý edi.
Árıne, dodada darabozdar dara shyǵady. Qazaqstandyq ekıpaj «joıǵysh avıasııa» jáne «tikushaq» atalymy boıynsha alǵy shepten kórindi. Qorytyndy esepte Qazaqstan úshinshi oryn aldy. Al jekeleı synda Araldyń azamaty, aspannyń aqıyǵy – Manastyń aldyna túser jan bolmady.
– Jalpy, qorytyndy boıynsha reseılik jáne qytaılyq ushqyshtardan keıingi orynǵa turaqtadyq. Saıys 3 kezeńnen turdy. Birinshi deneshynyqtyrý bolsa, ekinshi jerdegi nysanalardy izdep tabý, al odan keıin avıasııalyq qarý-jaraqty paıdalaný arqyly nysandy joıý. Mine, osy kezeńderden súrinbeýge tyrystyq. Eń bastysy, jattyqtyrýshynyń tapsyrmasy sátti oryndaldy, – deıdi ol.
Altyn júlde alǵan Manas Dáýletbaev «SÝ-25» áskerı ushaǵyn tizgindegen talantty ushqysh. Ol bul kúnde mindetin múltiksiz oryndap, qyzmetine adaldyǵymen kórinip keledi.
Qanybek ÁBDÝOV
Qyzylorda
