Jýyrda ǵana tabylǵan qyz-kelinshekterdiń áshekeı buıymdary da ǵun kezeńiniń tehnologııasynan habar beredi. «Ádette altynnan jasalǵan jádigerler syrttaǵy obalardan tabylady, qalanyń ortasynda emes. Kúltóbeden tabylǵan sırek kezdesetin jádigerdiń de ereksheligi osynda. Munyń jasalý úlgisi saq dáýirinde basqasha bolǵan, qosymsha tastardy áshekeılep betine japsyrý bolmaǵan. Bul ǵun, sarmat kezeńderine jatatyn, II-III ǵasyrǵa tán altyndar qataryn tolyqtyryp tur. Ár kezeńge tán birneshe altyn tabylyp otyr. Bizdi qyzyqtyrǵany – suraq belgisine uqsas syrǵa. Ol kóbine qypshaqtarǵa tán bolǵan. Árbir jádiger ata-tegimiz ben salt-dástúr ǵurpymyzdan habar beredi», dedi tarıh ǵylymdarynyń doktory, arheolog Muhtar Qoja baspasóz máslıhatynda.
Sondaı-aq arheologııalyq qazba jumystary barysynda arab grafıkasynda jazylǵan, kólemi 10h20 sm. keletin kitaptar hýmdan peshtiń ishindegi qulandy qyshtar arasynan tabylǵan. Búginde Qazaqstannyń eńbek sińirgen qaıratkeri, sýretshi-restavrator Qyrym Altynbekov qazbadan tabylǵan qos kitapty qaıta qalpyna keltirýge kirisken. Kitaptyń saqtalǵan qalyńdyǵy –
1,2 sm. Muqabasy kók tústi kónmen qaptalǵan kitaptyń paraqtary bir-birimen jabysyp qalǵan, ashýǵa kelmeıdi. Jazýy oqylatyn birinshi betinen «Biz mundaılardan emespiz» degen sóılemniń jobasy anyqtalypty. Mamannyń aıtýynsha, jádigerler aǵash untaǵynan jasalǵan sekildi. «Kóp eńbek etýimiz kerek. Qaıta qalpyna keltirip bolǵan soń ishindegi jazýlardy tolyqtaı oqyp, zertteýge múmkindik alamyz», dedi Q.Altynbekov.
Aıta ketelik, Kúltóbe qalashyǵyndaǵy jumystar Qazaq ǵylymı-zertteý ınstıtýty «ERG Kómek» korporatıvtik qorynyń qarjylyq qoldaýymen júrgizilýde.
Túrkistan oblysy
