Eki kúnge sozylǵan jarys qorytyndysy boıynsha Reseı Federasııasy Ulttyq ulanynyń komandasy qarsylastaryn qapy qaldyryp, jeńiske jetti. Reseılikter osymen ekinshi márte týrnır jeńimpazy atanyp otyr. Buǵan deıin olar 2017 jyly chempıon bolǵan edi. Ekinshi oryndy jalpylaı esepte elimizdiń Memlekettik kúzet qyzmetiniń komandasy enshilese, úshinshi orynǵa Ulttyq ulannyń quramasy turaqtady.
Komandalyq eseptegi jeńimpazdardy Qazaqstan Respýblıkasynyń Ishki ister mınıstri Erlan Týrgýmbaev marapattady.
– Búgin biz týrnırdiń aqtyq kezeńiniń kórermenderi boldyq. Biz jartylaı fınal jáne aqtyq syndardy kórdik. Sportshylar saıysta jiger tanytyp, batyldyqtary men qaısar minezderin kórsetti. Ishki ister mınıstrliginiń jáne óz atymnan rýhtyń kúshimen, jaqsy dene daıyndyǵynyń arqasynda jeńiske jetken barlyq sportshylardy bul jetistikterimen quttyqtaımyn, dedi Erlan Týrgýmbaev.
Jekpe-jek urysynan Halyqaralyq federasııasynyń Prezıdenti Sergeı Astahov Qazaqstanda uıymdastyrylatyn atalmysh týrnırdiń deńgeıi joǵary ekenin aıtyp ótti. Sondaı-aq bolashaqta osy týrnır negizinde Álem chempıonatyna irikteý kezeńin uıymdastyrý jospary baryn sóz etti.
Jekeleı salmaq dárejesi boıynsha kelesi sportshylar jeńiske jetti: 55 kıloda – Qorǵanys mınıstrliginen Qazbek Saǵyn, 60 kıloda – Ulttyq ulan jaýyngeri Álken Tólegenov, 65 kıloda – RF Rosgvardııasynyń jaýyngeri Dmıtrıı Kazygashev, 70 kıloda – ózbekstandyq sportshy Shahrýdın Abdýrahmanov, 75 kıloda reseılik Aleksandr Matmýratovqa qarsylas shaq kelmedi. Reseılikter 80, 85, 90 jáne 90-nan joǵary salmaq dárejelerinde de barlyǵynan basym tústi. Nýrmýhamed Beslaneev, Djamal Ibragımgadjıev, Roman Kopylov jáne Salımgereı Rasýlov jeńimpazdar atandy.
Jeńimpazdar baǵaly syılyqtar jáne dıplomdarmen marapattaldy. Rosgvardııanyń ókili Salımgereı Rasýlov «Úzdik tehnıkasy úshin» nomınasııasynda jeńimpaz atansa, ózbekstandyq Adıljon Sırojıddınov qarsylasty jyldam jeńgeni úshin marapattaldy.
