«Asa mańyzdy máselelerdiń biri – aýyldy keshendi túrde damytý. Aýyldarǵa naqty qoldaý kórsetip, zamanaýı ınfraqurylymdy damytýymyz kerek. Elimizde 6,5 myńnan astam aýyldyq eldi meken bar. Halyqtyń 40 paıyzdan astamy sonda turady. Solardyń 85 paıyzy negizgi eldi mekenderde nemese jaqyn mańdaǵy seriktes aýyldarda qonystanǵan. Úkimet óńir ákimderimen birlesip, tirekti eldi mekenderdi damytý máselelerin muqııat qaraýy kerek. Olar laıyqty ınfraqurylymǵa jáne zamanaýı talaptarǵa saı jańǵyrtylýy qajet. Bul úshin, árıne, jaıly joldar, qoljetimdi baılanys pen ınternet, zamanaýı bilim berý, densaýlyq saqtaý, mádenıet jáne sport nysandary qajet», dedi Qasym-Jomart Toqaev.
