Joldaýda halyq úshin saıası, ekonomıkalyq jáne áleýmettik salalar boıynsha jaqsylyq nyshandary barshylyq. Tómende sonyń bireýine toqtalyp, oı órbitpekpiz. Bul – zeınet jasyna jetip úlgermegen azamattardyń zeınetaqy qoryndaǵy jınaqtalǵan qarjysynyń bir bóligin kúni buryn paıdalaný, ıaǵnı ózderin tolǵandyrǵan
problemalaryn sheshý úshin jumsaý máselesi.
Joldaýda:
«Qazir jumys istep júrgen adam óziniń zeınetaqy jınaǵyn tek zeınetke shyqqannan soń ǵana paıdalana alady. Biraq olardyń bul qarajatty zeınetke shyqqanǵa deıin paıdalanǵysy keletini túsinikti jaǵdaı. Jumys isteıtin azamattar ózderiniń zeınetaqy jınaǵynyń bir bóligin belgili bir maqsatqa, sonyń ishinde baspana satyp alýǵa nemese bilim alý úshin paıdalaný máselesin jyl sońyna deıin pysyqtaýdy Úkimetke tapsyramyn» dedi Prezıdent.
Meniń oıymsha, zeınet jasyna taqaǵandardyń zeınetaqy qorynda jınaqtalǵan qarjysyn zeınetkerlikke shyqpaı turyp, turǵyn úı jaǵdaılaryn jaqsartý úshin ózderine bergenderi óte durys bolar edi. Osylaısha bir oqpen eki qoıandy atýǵa bolady.
Birinshiden, adam zeınetkerlikke shyǵar aldynda turǵyn úı jaǵdaıyn jaqsartady. Bul – osyndaı múmkindikke ıe bolǵan adamnyń jalpy ómirin jaqsartý degen sóz. Osylaısha adamnyń óz ómirine, qoǵamǵa sińirgen eńbegine jáne memleketke rızashylyǵy artady.
Ekinshiden, qazaq halqynyń dástúrli ómir súrý salty jaǵdaıynda Prezıdenttiń bul batyl bastamasy bir otbasynyń ǵana emes, eki otbasynyń turǵyn úı jaǵdaıyn jaqsartýǵa yqpal etken bolar edi. О́ıtkeni dástúrli otbasy jaǵdaıynda ata-analardyń úılengen kenje uldaryn qoldarynda ustaıtyny belgili. Osyndaı jaǵdaıdaǵy kóptegen otbasylar qazir páterdiń tarlyǵyna baılanysty qysylyp-qymtyrylyp ómir súrýde. Osyndaı turmys taýqymetine baılanysty jastardyń ajyrasyp ketý jaǵdaıy da jıi baıqalady.
Demek, atalǵan máseledegi jaǵymdy nyshannyń qazir qoǵamda barǵan saıyn beleń alyp kele jatqan nekeniń turaqsyzdyǵy problemasyn áleýmettik-ekonomıkalyq turǵydan sheshýge de ıgi yqpaly bolar edi.
Úshinshiden, turǵyn úı naryǵynda jańa qozǵalystar paıda bolar edi. Bul – turǵyn úı naryǵyna halyq tarapynan jańa ınvestısııalyq qarjy keledi degen sóz. Qurylys salasynda jańa jumys oryndary ashylady. Memleketke túsetin salyq kólemi artady.
Tórtinshiden, qazir ıpotekalyq nesıe qymbat. Adamdardyń zeınet jasyna taqaǵan belgili bir bóligi ıpotekalyq nesıeni paıdalanbaı-aq óziniń ómir boıy jınaǵan adal qarjysyn paıdalaný arqyly jaǵdaıyn jaqsartyp jatsa, bul ádiletti bir sheshim retinde boı kórsetip, olardyń memleketke degen senimderin de arttyra túser edi. Qazirgi ómirdiń kózge kórine bastaǵan bir shyndyǵy, halyqtyń memleketke degen seniminiń báseńdeı túskeni bolyp otyr.
Oǵan kóp sebeptiń biri – Úkimettiń óz azamattaryn ekinshi deńgeıli bankter aldyna aıaýsyz baılap bergendigi bolyp otyr. Eger memleket adamdardyń zeınetaqy qoryndaǵy óz qarjylaryn turǵyn úı jaǵdaıyn jaqsartý úshin kúni buryn paıdalanýǵa ruqsat berse, mine osylaısha jeke adam da, memleket te utysqa shyǵar edi dep oılaımyn.
«Jastyq shaqta beınet ber, qartaıǵanda zeınet ber» dep atam qazaq beker aıtpaǵan. Osy maqaldy «adal jáne qoǵam úshin ıgilikti ómir súrýdiń ulttyq formýlasy» dep te ataýǵa bolar edi. Biz damyǵan elder qarttarynyń shynymen de zeınet jaǵdaıynda ómir súrip jatqandyǵyn kórip otyrmyz. Eger joǵarydaǵy másele sheshilse, bul bizdiń memlekettiń de qarttarymyzdy dál sondaı bolmasa da, belgili bir jaqsy jaǵdaıǵa jetkizý baǵytynda jasaǵan batyl da serpilisti áreketi retinde qabyldanyp, kóptegen adamdardyń rızashylyǵyn týǵyzǵan bolar edi.
