Sharanyń ashylýyna Qazaqstandaǵy Erazmýs+ ulttyq baǵdarlamasy keńsesiniń dırektory Shaızada Tasbolatova, Narhoz ýnıversıtetiniń rektory Endrıý Vahtel, Katalonııa Saıası ýnıversıtetiniń koordınatory Vınchens Fernandes qatysty.
Forým ýnıversıtetterdi ınternasıonaldandyrý joldaryn qurý, halyqaralyq jáne mádenıaralyq túsinistik, ınnovasııalyq tehnologııalardy qoldaný arqyly ınternasıonaldandyrýdy damytýdyń joǵary sapaly strategııasyn jasaý maqsatynda qolǵa alynǵan. Halyqaralyq konferensııa aıasynda otandyq jáne sheteldik mamandar JOO-lardy ınternasıonaldandyrý jóninde baıandama jasady, sondaı-aq «Internasıonaldyrýdyń strategııalyq josparyn ázirleý» jáne «Sheteldik stýdentter men oqytýshylar úshin «WELCOME» jaǵdaılaryn jasaý» taqyrybynda eki seksııaǵa bólingen dóńgelek ústel uıymdastyryldy.
Jıynnyń ashylýynda sóz alǵan L.N.Gýmılev atyndaǵy Eýrazııa ulttyq ýnıversıtetiniń Halyqaralyq baılanystar jáne ınnovasııalar jónindegi prorektory Aqbota Nııazqyzy sheteldik qonaqtarǵa sharany uıymdastyrýshylardyń biri sanalatyn ýnıversıtettiń tarıhyna qysqasha toqtalyp ótti. «Ýnıversıtetimiz 1996 jyly Elbasy N.Nazarbaevtyń buıryǵymen quryldy. Jas joǵary oqý orny bolǵanyna qaramastan, halyqaralyq reıtıngterde aldyńǵy qatardan kórinip keledi. Al joǵary bilimdi ınternasıonaldandyrý ýnıversıtetimizdi damytýdyń basty baǵyty sanalady. Bul boıynsha jumystardy turaqty jáne júıeli túrde júrgizip kelemiz», dedi A.Nııazqyzy. Onyń málimdeýinshe, atalǵan JOO álemdegi 25 eldiń stýdentterine «Alma mater», ıaǵnı bilim beretin oryn bolyp tur. «Halyqaralyq uıymdarmen áriptestikte júzege asyrylǵan jobalar jeterlik. Sonyń ishinde aıryqsha atap ótetinimiz – Erazmýs+ baǵdarlamasy. Ýnıversıtetimiz joǵary bilimdi ınternasıonaldandyrýda joǵary nátıjege jetkizgen bul baǵdarlamaǵa 2015 jyldan bastap qatysty. Osy ýaqyt ishinde 200-den asa adam baǵdarlamaǵa qatysyp, Eýropanyń 36 elinde taǵylymdamadan ótti», dedi prorektor.
Al halyqaralyq bilim berý jónindegi amerıkalyq keńestiń ókili Maqsat Qoshqarbaev joǵary bilimdi ınternasıonaldandyrýda sheteldik ýnıversıtettermen birlikte jumys isteýdiń mańyzyna toqtaldy. «Qazaqstandyq JOO-lardyń Amerıka ýnıversıtetteri arasyndaǵy áriptestik arqyly birqatar joba iske asyrylyp, elimizdiń jastary úshin granttar qarastyryldy. Bizdiń keńes stýdentterdiń halyqaralyq dárejede bilim alyp, álemdik standarttarǵa saı maman bolýyn qamtamasyz etýmen ǵana emes, professorlar men oqytýshylardyń ózara tájirıbe almasýyna, sonymen qatar reıtıngi joǵary ǵylymı jýrnaldarǵa ǵalymdardyń maqalasyn jarııalaýǵa jaǵdaı jasaıdy», deıdi M.Qoshqarbaev.
