Memleket basshysynyń jazbasynan keıin kóp uzamaı Densaýlyq saqtaý mınıstri Eljan Birtanov ta twitter paraqshasynda osy iske qatysty jazba jarııalady. Onda «Prezıdenttiń tapsyrmasy boıynsha máseleni jeke baqylaýǵa aldym. Barlyǵy zań aıasynda bolatynyna senimdimin. Áriptesterimnen sabyr saqtap, ortaq mıssııany ári qaraı jalǵastyrýlaryn suraımyn» delingen.
Oqıǵa týraly qysqasha baıandaıtyn bolsaq, otandyq BAQ-tarda Almaty qalasyndaǵy №4 aýrýhananyń dárigeri Qanat Tezekbaevtyń tutqyndalýyna baılanysty onyń jubaıy Dına Tezekbaevanyń ashyq haty jarııalandy. Memleket basshysynyń atyna jazylǵan ashyq hatta aıtylǵandaı, 2019 jylǵy shilde aıynda jol apatyna ushyraǵan Nursultan Kúdebaev №7 aýrýhanaǵa, artynsha №4 aýrýhanaǵa jetkizilip, sol jerde operasııa jasalǵan. Artynsha Germanııadaǵy aýrýhanaǵa jiberilgen N.Kúdebaev Almatydaǵy operasııadan keıin 26 kún ótkende sol jaqta qaıtys boldy. N.Kúdebaev Almaty qalasy Ishki ister departamentiniń basshysy Serik Kúdebaevtyń uly ekenin aıta keteıik.
N.Kúdebaev qaıtys bolǵannan keıin Qanat Tezekbaev №4 aýrýhananyń bas dárigeri qyzmetinen bosatylyp, eshqandaı túsindirýsiz, kepilmen bosatý quqyǵynsyz tutqynǵa alynǵan. Dáriger Qanat Tezekbaev N.Kúdebaevqa jasalǵan operasııaǵa tek eki kómekshiniń biri retinde qatysqany, operasııany jasaýǵa jáne nátıjesine tikeleı jaýapty bolmaǵany týraly da ashyq hatta jazylǵan. №4 qalalyq aýrýhananyń qyzmetkerleri de tutqynǵa alynǵan Qanat Tezekbaev pen anestezıolog Asqar Tuńǵyshbaevtyń óz isine berilgen bilikti mamandar ekenin aıtyp, tergeýdiń ádil júrgizilýin surap, ashyq hat jarııalady.
Q.Toqaevtyń tvıtter jazbasynan keıin kóp uzamaı keshe keshqurym Qanat Tezekbaev eshqaıda ketpeý týraly tilhatpen bosatyldy.
