El jetistikteri erekshe ataldy

Qasym-Jomart Toqaev BUU Bas Assambleıasynyń Jalpy debat­tarynda Qazaqstan Respýb­lıkasynyń Prezıdenti retinde tuńǵysh ret sóz sóıledi. Sózin memlekettik til­de bas­taǵan Pre­zıdent jahandyq deń­geı­de oryn alyp jatqan geosaıa­sı jáne geoekonomıkalyq syn-qater­ler men qaqtyǵys úrdisteri, oǵan qarsy turýdaǵy atqarylyp jatqan is-qımyldar týraly, sondaı-aq Qazaq­stannyń bul jolda jetken jetis­tikteri men tájirıbesi týraly erekshe atap ótti. Jahandyq syn-qater­ler úrdisteri dep Pre­zı­dent birin­shiden, toqtamaı jat­qan áske­rı qaqtyǵystardy, ekin­shiden, jahan­dyq jáne aımaq­tyq der­ja­valar­dyń bir-birine degen senim­sizdigin jáne onyń álemdik turaq­tylyqqa tıgizetin teris áserin, úshinshiden, áleýmettik, ekono­mı­kalyq jáne tehnologııalyq teńsiz­dik, sondaı-aq jahandyq qaryz daǵ­da­­rysyn, tórtinshiden, qorshaǵan or­ta­nyń buzylýy saldarynan oryn alyp jatqan klımattyń ózgerýin kórsetti.

Memleket basshysy belgilep ketken úrdisterdiń ishinde áskerı qaqtyǵystarǵa tosqaýyl qoıý má­selesi basa nazar aýdararlyq jaǵ­daı. Áskerı operasııalardyń kesirinen myńdaǵan jazyqsyz jan qurban bolyp jatyr. Bul arada Qazaqstan BUU bitimgershilik qyzmetterine belsene qatysyp keledi. Qazirgi ýaqytta BUU-nyń Lıvandaǵy bitimgerlik mıssııasynda 42 elden 10 myńnan astam áskerı qyzmetshi qyzmetin óteýde.

Máselen, TMD boıynsha Qazaq­­­­stan soǵys bolyp jatqan aımaq­tarǵa jiberetin bitimgerler sany bo­ıyn­sha aldyńǵy qatarda tur­ǵany belgili. Osylaısha 2018 jy­ly eli­mizden Lıvandaǵy BUU mıs­­­sııa­syna (UNIFIL) Úndi-Qazaq­stan bitimgerler batalo­nyna 120 áskerı qyzmet­ker ji­beril­di. Qazaqstan úshin bitim­ger­lik is-áre­ket halyqaralyq jáne óńirlik qaýip­s­izdikti ny­ǵaı­týdaǵy memle­ket­tik saıasat­tyń mańyzdy bóligi re­tin­­de qaras­ty­rylady. 2015 jyl­ǵy 15 maý­symda «Qazaqstan Res­pýb­lıka­sy­nyń bitimgerlik is-áre­ket tý­raly» Zańy qabyldandy. 2014 jyldan bastap, Qazaqstan ofı­ser­­leri BUU mıssııasy aıasynda Batys Sahara men Kot-d’Ivýarda beı­bit­shilik pen qaýipsizdikti saqtaý maq­satynda áskerı qyzmetten ótti. Sonymen qatar qazaqstandyq bi­tim­gerler Ulybrıtanııa jáne AQSh-pen birlese «Dala qyrany» arnaıy-taktıkalyq bitimgerlik oqý-jattyǵýlaryna qatysady. Bul – qazaqstandyq jaýyngerler úshin úlken tájirıbe.

О́zara kelispeýshilik pen qaq­ty­ǵys­tan bas tartyp, birlikke um­tylý qazirgi zamannyń basty talabyna aınalý kerek.

Mádına BEKTENOVA,
Qazaqstan strategııalyq zertteýler ınstıtýtynyń jetekshi ǵylymı qyzmetkeri