Semeı qalasynda Qazaqstannyń Halyq ártisi, Memlekettik syılyqtyń ıegeri, kórnekti teatr jáne kıno aktrısasy Ámına О́mirzaqovanyń 100 jyldyǵyna arnalǵan XXVII respýblıkalyq teatr festıvali márege jetti. 20-25 qyrkúıek aralyǵynda Mádenıet jáne sport mınıstrligi men Shyǵys Qazaqstan oblysy ákimdiginiń qoldaýymen jáne Qazaqstan teatrlary assosıasııasynyń uıymdastyrýymen ótken sharaǵa 12 teatr ujymy úzdik qoıylymdaryn usynǵan bolatyn. «Osydan bir apta buryn elimizdiń túkpir-túkpirinen kelgen ónerpazdar kezdesip, tájirıbelerin ortaǵa salyp, festıvalimizdiń saltanatty ashylýy ótken edi. Qaı kezde de qoshtasý qıyn. Búgin mine, kil myqtylardyń ishinen oıyp turyp oryn alǵan kim myqtyny, úzdikterdi anyqtaıtyn bolamyz. Osyndaı festıvaldar ár óner ıesiniń tulǵalyq damýyna jáne ósýine áser etedi. Áli talaı teatr merekesinde kezdesetin bolamyz» dedi festıvaldiń jabylý saltanatynda sóz alǵan Qazaqstannyń Eńbek Eri, KSRO jáne Qazaqstannyń Halyq ártisi, qazylar alqasynyń tóraǵasy, Qazaqstan teatrlary assosıasııasynyń prezıdenti, teatr jáne kıno akteri, professor Asanáli Áshimov.
Jabylý saltanatynda Ámına О́mirzaqovanyń sahnada oınaǵan 30 rólinen úzindi kórsetildi. Saltanatty rásimge oblys ákimi apparatynyń basshysy Azamat Muhamedchınov qatysyp: «Uly dalanyń uly esimine aınalǵan jerlesimiz, Ámına anamyzdyń 100 jyldyǵyna oraı Asanáli Áshimov bastap kelgen barsha óner maıtalmandaryna zor alǵys bildiremin. Árdaıym elge qyzmet etip, tek ónerdiń bıiginen kórinýlerińizge tilektespin» dep lebizin jetkizip, oblys jurtshylyǵy atynan qazylar alqasynyń tóraǵasy Asanáli Áshimov pen qazylar alqasynyń barlyq múshelerine shapan jaýyp, syı-qurmet kórsetti.
Sonymen, festıval qorytyndysynda ónerpazdar men óner ujymdary 13 atalym jáne Shyǵys Qazaqstan oblysy ákiminiń arnaıy júldesimen marapattaldy. F.Dostoevskıı atyndaǵy orys drama teatry «Perishte» spektakli úshin «Úzdik kórkemdik sheshim», Jan daýysy» spektakli úshin Farhat Moldaǵalı «Úzdik rejıssýra», «Láıli-Májnún» spektaklindegi «Láıliniń anasy jáne kempir» rólderi úshin Botagóz Maqsutova «Ámına О́mirzaqova atyndaǵy «Eń úzdik áıel beınesi», «Álıhannyń amanaty» spektaklindegi «Álıhan» róli úshin Medǵat О́mirálıev «Úzdik er adam beınesi», «Abaı» spektaklindegi «Abaı» róli úshin Baqytbek Temirbekov «Qazaqstannyń teatr ónerine qosqan úlesi úshin», M.Gorkıı atyndaǵy Memlekettik akademııalyq orys drama teatry «Evgenıı Onegın» spektakli úshin «Úzdik akterlik ansambl», Abaı atyndaǵy qazaq mýzykalyq drama teatry «Ahmettiń amanaty» spektakli úshin «Tarıhı taqyrypty ıgerýdegi izdenisteri úshin», О́skemendegi oblystyq drama teatrynyń akteri Eldos Masalımov «Qandy azý» spektaklindegi «Borash» róli úshin «Eń úzdik ekinshi plandaǵy er adam beınesi», «Teatr 180º» spektaklindegi «Dottı» róli úshin Gúlmıra Jakılına «Eń úzdik ekinshi plandaǵy áıel adam beınesi», «Balalyq shaqqa saıahat» spektakliniń rejısseri Jangeldi Sadyqov «Úmit», «Teatr 180º» spektakli úshin «Nomad» teatry «Úzdik debıýt» jáne «Daýys. Daý is» spektakli úshin Semeıdegi «Darıǵa-aı» jastar teatry «Shyǵarmashylyq jetistikteri úshin» nomınasııalary boıynsha marapattaldy.
Al «Eń úzdik spektakl» nomınasııasy Almatydaǵy Ǵ.Músirepov atyndaǵy qazaq memlekettik akademııalyq balalar men jasóspirimder teatry «Adamzat» spektakli úshin berildi. Júlde qory - 1,500 000 teńge.
Sondaı-aq, Shyǵys Qazaqstan oblysy ákiminiń júlde qory 1,000 000 teńgeni quraıtyn arnaıy júldesi «Darıǵa-aı» jastar teatryna tabystaldy.
SEMEI
