Úkimet basshysy «Digital energy» kórmesin qarap, Islandııanyń eks-Prezıdenti jáne «Arktıkalyq sheńber» halyqaralyq forýmynyń tóraǵasy O. R. Grımssonmen kezdesý ótkizdi, onda Almaty oblysynda geotermaldy energetıkany damytý perspektıvasyn talqylady, sondaı-aq, Munaı eksporttaýshy elder uıymynyń (OPEK) Bas hatshysy M. S. Barkındomen kezdesýde Qazaqstannyń OPEK-pen ózara is-qımyl máselelerin talqylady.
Forýmnyń saltanatty ashylý rásiminde Asqar Mamın Qazaqstannyń dástúrli qýat kózderiniń tıimdiligi men ónimdiligin arttyratynyn, sonymen qatar, jańartylatyn energııa kózderi salasyndaǵy aımaqtyq kóshbasshy retinde óziniń pozısııasyn josparly túrde nyǵaıtatynyn atap ótti.
«2017 jyly Astanada Ekspo kórmesin ótkizgen ýaqyttan beri Qazaqstan ekonomıkaǵa keshendi «jasyl» sharalardy engizýde eleýli jetistikterge qol jetkizdi. Búginde biz 3000-nan astam megavattqa deıin jańartylatyn energııa kózderi qorjynyn keńeıttik. 2019 jyldyń alǵashqy 6 aıynyń ózinde sektordaǵy óndiris 31,7%-ǵa ulǵaıtyldy», — dedi Premer-Mınıstr.
Úkimet basshysy Qazaqstan jylyna 90 mln-ǵa jýyq tonna munaı óndiretinin, bul elimizdi 15 iri álemdik óndirýshilerdiń qataryna qosatynyn atap ótti.
«Biz 2014 jyly 14,9 mln munaı óńdesek, 2019 jyly 17,2 mln tonna munaı óńdeýdi josparlap otyrmyz. Bul bizge birqatar munaı ónimderine degen ishki qajettilikterimizdi tolyǵymen jabýǵa múmkindik beredi. Osy jyly tabıǵı gaz óndirý 55 mlrd tekshe metrden asady dep kútilýde. Qazirgi qarqyn saqtalǵan jaǵdaıda biz 2027 jylǵa qaraı 80 mlrd tekshe metrden astam óndiremiz», — dedi A. Mamın.
Premer-Mınıstr iske asyrý jáne ázirleý satylaryndaǵy qolda bar jobalar qorjyny Qazaqstandy álemdegi polıetılen men polıpropılenniń iri eksporttaýshysyna aınaldyrýǵa arnalǵanyn atap ótti.
«Gaz óndiretin jabdyqqa suranystyń artýy gaz-hımııa mashınasyn jasaýda eleýli jetistikterge ákeldi. 2016 jyldan bastap 2018 jylǵa deıin saladaǵy óndiris kólemi shamamen 40%-ǵa - 39,4 mlrd-tan 54,8 mlrd teńgege deıin ósti, bul búkil ekonomıka úshin ártaraptandyrýdyń ósip kele jatqan áleýetin kórsetedi», — dep atap ótti Úkimet basshysy.
Kazenergy Eýrazııalyq forýmy óziniń on jyldan astam tarıhynda aımaqtaǵy energetıkalyq sektordyń basty halyqaralyq sharasyna aınaldy. Forým energetıkalyq naryqqa qatysýshylar arasynda tıimdi dıalogty qamtamasyz etýge, energetıkalyq júıeni damytýdyń ózekti úrdisteri men baǵyttaryn qarastyrýǵa baǵyttalǵan. Atalǵan shara aıasynda alǵa qoıylǵan perspektıvalar men strategııalyq bastamalar elimizdiń munaı-gaz jáne energetıkalyq kesheniniń serpindi jáne turaqty damýyna qolaıly jaǵdaılar jasaıdy.
Jyl saıyn Forýmǵa álemniń 50-den astam elinen 2500-den astam qatysýshy, onyń ishinde 30-dan astam halyqaralyq uıymdar, sondaı-aq 300-ge jýyq iri energetıkalyq kompanııalar keledi.
