Shyǵý tegi makedonııalyq Maıkl Kloýz – halyqaralyq art-qaýymdastyqta moıyndalǵan sheber. Jalpy alǵanda, ol AQSh, Belgııa, Italııa, Bolgarııa, Fransııa, Germanııa, Túrkııa, Mysyr, Islandııa, Rýmynııa, Makedonııa, Reseı jáne taǵy basqa túrli elderde 130 jeke kórkemsýret kórmesin ótkizgen.
Maıkldyń basqa óner ıelerine uqsamaıtyn bir ereksheligi bar. Álemniń ár qıyrynda óziniń sýret kórmelerin úzbeı ótkizetin ol týyndylaryn kórmeni tamashalaýǵa kelgen kóńili aýǵan adamǵa nemese mýzeı ujymyna tegin syıǵa tartady. «О́ner – izgilik jolynda» dep atalatyn bul joba da avtordyń sol dástúrli kórmeleriniń kezekti jalǵasy. Onyń basty ıdeıasy – óner eshqandaı qalypqa syımaıtyn, elder men adamdardy geosaıası jaǵdaıyna nemese ultyna qaramastan biriktire alatyn qýatty kúsh ekenin kórsetý. Shyǵarmashylyq pen kásibı qyzyǵýshylyqtyń san túrli vektoryn qatar ustaǵan sýretshi vızýaldyq ónerden bólek, dızaın, ssenografııamen de aınalysady, teatr, kıno jáne televıdenıedegi jumystarǵa da, akterlik sheberlikke de aralasady. Avtor óziniń bir suhbatynda qyzmet-árekettiń árbir túri birin-biri tolyqtyryp, jarqyrata túsýge jol ashatynyna kóz jetkizgenin jazǵan.
Maıkl Kloýzdyń avtorlyq tásili qarapaıym sýretter men obrazǵa kóshirilgen yqshamdylyqty týdyratyn tústik ekspressııany, dekoratıvtik stıldeý men jalpylaýdy biriktiredi. Barlyq kompozısııalar adam tabıǵatyn zertteýge jáne kórkemdik tásilder arqyly izgilik kelbetin izdeýge baǵyttalǵan.
– Kloýz óz shyǵarmashylyǵynda eshteńe aralaspaǵan taza túster men kontrasty sulbalarǵa negizdelgen ózine tán stıl qalyptastyrdy. Jyljymaly ıkemdi syzyqtar – basty keıipkeri adam, birinshi kezekte áıel bolyp keletin kompozısııalardy qurýdyń basty quraly. Áıeldiń dıdary – sezimtal, oıly da sulý, úılesimdi ári óz kemeldigin baıqaǵysh. Maıkl Kloýz ata-anasy Kanadaǵa emıgrasııaǵa kelgennen keıin, 1954 jyly Torontoda dúnıege keldi. Maıkldyń ónerge degen qushtarlyǵy bala kezinen baıqaldy. 1977 jyly Ontarıodaǵy óner kolledjin bitirip, Raıersondaǵy polıtehnıkalyq ýnıversıtettiń ınterer dızaıny mamandyǵy boıynsha bilim alǵan ol álemdik ónerde óz jolyn qalyptastyrǵan sýretshi, – deıdi mýzeıdiń baspasóz qyzmetiniń jetekshisi Klara Isabaeva.
Sońǵy jyldary álem elderine saıahattaýdy ómirlik daǵdysyna aınaldyrǵan tanymal týyndyger kórme aıaqtalýǵa jaqyn kúnderi óziniń zaıybymen birge Qazaqstanǵa kelýdi josparlap otyrǵanyn jetkizgen.
ALMATY
