«The Sutton Trust» uıymynyń málimdeýinshe, eń joǵary deńgeı – Londonda. Ulybrıtanııa astanasyndaǵy orta mektep oqýshylarynyń 41 paıyzy mektepten tys ýaqytta taǵy da sabaq oqıdy. Osyǵan oraı, qaıyrymdylyq uıymy qaltaly ári jomart jandardy turmysy tómen otbasynyń balalaryna qosymsha sabaq alýy úshin qoldaý kórsetýge shaqyrǵan. Qaıyrymdylyq qordyń (joǵarydaǵy uıym) negizin qalaýshy Pıter Lempl (Peter Lampl): «Bir seansy kem degende 25 fýnt sterlıng turady, kóptegen ata-analar mundaı somany tóleı almaıdy», depti. 25 fýnt degenińiz qazirgi kýrspen 11 925 teńge bolady. Biz anglııalyq jekemenshik oqytý ortalyqtarynyń saıttaryna kirip, baǵalaryn baǵamdap kórdik. Keıbir qosymsha oqytý ortalyqtary bir balany daıyndaýy úshin saǵatyna 15 pen 41 fýnttyń (7155-19557 teńge) arasynda aqsha alady eken.
Joǵaryda atalǵan uıym úzdik oqýshylardyń qataryna qosylýǵa yqpal etkenimen, azdaǵan qoldaýdy qajet etetin áleýmettik jaǵdaıy nashar otbasynyń balalaryna alańdaýshylyq bildirgen. Sondaı-aq keı ortalyqtardyń jumysyn kóleńkeli bızneske jatqyzypty. Jaǵdaıy jaqsy otbasylardyń 34 paıyzy, al jaǵdaıy tómendeýleriniń 20 paıyzǵa jetpeıtinderi qosymsha oqytatyn muǵalimderdi jaldaıtyn kórinedi. Uıymnyń zertteý qorytyndysyna sáıkes, orta mektep muǵalimderiniń tórtten bir bóligi sońǵy eki jylda jeke repetıtor bolyp jumys istegen, olardyń kópshiligi ata-analardyń suraýymen sabaqtan keıin sabaq beredi.
Shyndyǵynda, bul – bizde de beleń alyp bara jatqan úrdis. Naryqtyq zamanda mundaı múmkindiktiń muǵalimder úshin qosymsha tabys kózi bolyp turǵany ras. Alaıda osy jaıt máseleniń ekinshi jaǵyn alǵa shyǵarady. Áleýmettik jaǵynan oqýshylardyń arasynda psıhologııalyq ózgeristerdiń týyndaýyna da sebep bolyp otyr. Iаǵnı ata-analary men mektep muǵaliminiń nazaryndaǵy, qoldaýyndaǵy oqýshylar ózderin turmysy tómen otbasyndaǵy balalardan joǵary ustaıdy. Al elimizde keń taraǵan úı tapsyrmasyna adam jaldaý jumysbasty ata-analardy odan saıyn balalarynan alystatýǵa alyp keletin kórinedi.
