Zulfuhar Sansyzbaıuly aldymen jergilikti atqarýshy organdarynyń ókilderimen Qoshqar ata qoımasyna baryp, ýly kóldi zalalsyzdandyrý boıynsha qolǵa alynǵan jumystarmen tanysty. Munda 105 tonna ýytty qaldyqtar kómilgen, sonymen qatar 52 tonna radıoaktıvti qaldyqtar taǵy bar.
Aıta ketý kerek, Qoshqar ata qoımasynda jınaqtalǵan ýly qaldyqtar 2015 jyldan beri sottyń sheshimimen memleket menshigine ótken bolatyn. Búginde ýly kóldi zalalsyzdandyrý úshin 17,5 mlrd teńge qajet.
Budan soń qoǵam ókilderimen kezdesý ótkizildi. Onda jańadan engiziletin Qazaqstan Respýblıkasynyń Ekologııalyq kodeksiniń jobasy týraly aıtyldy. Jańa Kodekstiń negizgi basym baǵyttarynyń biri bolyp –«lastaýshy tóleıdi» atty halyqaralyq ekologııalyq qaǵıdasy júzege asyrylmaq. Bul degenimiz, qorshaǵan ortaǵa óziniń zııanyn keltiretin kásiporyn ekologııalyq shyǵyndy qaıta retke keltirý boıynsha shyǵyndardy tolyqtaı óz moınyna alatyn bolady.
Ekologııalyq kodekstegi jańa jobanyń redaksııasy memlekettik retteý jáne qorshaǵan ortany qorǵaý salasyndaǵy júıeniń ashyqtyǵy men tıimdiligin kórsetpek, sonymen qatar Qazaqstan Respýblıkasynyń halyqaralyq mindettemeleri normalaryn úılestirýge baǵyttalǵan.
Komıtet tóraǵasy Zulfuhar Joldasov sharaǵa qatysýshylardyń suraqtaryna jaýaptar qaıtaryp, Ekologııalyq kodekstegi jańa jobaǵa qatysty aıtylǵan barlyq usynystar men pikirler Mınıstrlikpen jáne sarapshylarmen mindetti túrde eskeriledi dep sendirdi.
Eske sala keteıik, Ekologııalyq kodekstiń jańa jobasy parlamenttiń qaralýyna 2019 jyldyń sońynda joldanady dep josparlanǵan. Qazirgi ýaqytta qujattyń jobasy qoǵamdyq talqylaý kezeńinen ótýde.
Sharaǵa Mańǵystaý oblysy ákiminiń birinshi orynbasary Álıhan Qyraýbaev, oblystyq tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekov, óńirlik ekologııa departamentiniń qyzmetkerleri, munaı jáne gaz kompanııalary, úkimettik emes uıymdary, qoǵamdyq uıymdar, buqaralyq aqparat quraldary, shıkizat óndirýshiler jáne basqa da múddeli memlekettik organdarynyń ókilderi qatysty.
Sondaı-aq, basqosýda Zulfuhar Sansyzbaıuly Mańǵystaý oblysy ekologııa departamentiniń basshysy bolyp taǵaıyndalǵan Rýslan Tókenovty tanystyrdy. Buǵan deıin Rýslan Kárimuly atalmysh departamenttiń basshysynyń mindetin atqarýshy bolyp keldi. Komıtet tóraǵasy jańa basshyǵa qyzmetinde joǵary nátıjege qol jetkizýine, alda turǵan mindetterdi buljytpaı oryndaı alatynyna senim bildirdi.
