Erte sóngen juldyzdyń sanaýly ǵumyryndaǵy jigerli jetistikterin, qaıtpas qaısarlyǵyn, uljandylyǵy men namysqoılyǵyn kórsetý arqyly búgingi urpaqty rýhtandyrý, salamatty ómir saltyn nasıhattaýdy maqsat etken fılmniń alǵashqy kórsetilimine dańqty sportshynyń ata-anasy, týystary arnaıy qatysty. «Bekzattyń ımandylyǵy, úlkendi syılaıtyn kishipeıildiligi, qazaqylyǵy, tabandylyǵy, alǵa qoıǵan maqsatyn oryndaıtyn qaısar minezi qazirgi qazaq jastaryna kerek», deıdi Bekzattyń ákesi Seıilhan Sattarhanov.
Fılm tusaýkeserinde sóz alǵan «Habar» agenttigi» AQ basqarma tóraǵasynyń birinshi orynbasary Rınat Kertaev fılmniń túsirilim jumystary Túrkistan, Almaty jáne Ystanbul qalalarynda ótkenin aıtyp ótti. Kartınanyń rejısseri – Murat Bıdosov, ssenarııin Serjan Zakeruly jazǵan. Basty róldi 2006-2007 jyldary kıkbokstan jastar arasynda eki ret Qazaqstan chempıony bolǵan jas akter Samat Ázimqulov somdaǵan. Fılmniń sıýjettik jelisinde Bekzat Sattarhanovtyń balalyq shaǵy, bozbala kezeńi jáne ómiriniń sońǵy sáti qamtylǵan. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Boksqa kelgen alǵashqy sátteri, aıanbaı ter tókken jattyǵýlary, jarystardaǵy jeńisi, Olımpıada shyńyn baǵyndyrǵan sátteri kórinis tapqan tolyqmetrli kartına qazannan bastap elimizdiń kınoteatrlarynda kórermen nazaryna usynylmaq. Al «Habar» arnasynda jeltoqsan aıynda kórsetiledi.
Túrkistan oblysy
