Alǵashqy «Altyn tulpar» báıgesi 43 shaqyrym bolǵany jankúıerler esinde. «Júırikten júırik ozar jarysqanda» degendeı, 2014 jylǵy alamanda Qaraǵandy oblysynyń júırigi Baqtory aldyna qara salmaı dara keldi. Elimizdiń atbegileri sol joly báıge qashyqtyǵynyń 43 shaqyrymnan da kóbirek bolýyn ótingen-di. Sóıtip 2015 jyly «Altyn tulpardyń» báıge joly 51 shaqyrymǵa uzartyldy. Bul qashyqtyqta Jambyl oblysynyń tulpary «Camaldan» ozǵan qylquıryqty bolǵan joq. 2016 jylǵy báıgede Jetisý ólkesiniń júırigi Jannur máreden jarqyrap jalǵyz ótti. 2017 jyly joǵarydaǵy Samal atty sáıgúlik «Altyn tulpardyń» on mıllıon teńgelik bas báıgesin ekinshi márte qanjyǵasyna baılady.
«Altyn tulpardy» tek elorda tóńireginde ǵana emes, elimizdiń basqa óńirlerinde de ótkizýdi uıǵarǵan Ulttyq sport qaýymdastyǵy kezekti alaman báıgeni Atyraý óńirinde uıymdastyrýdy jón kórip otyr. Jarystyń resmı ataýy – «Altyn tulpar – Jaıyq jaǵasynda». Iаǵnı, bıylǵy jyldyń basty báıgesi 12 qazanda Atyraý oblysy, Mahambet aýdany, Taldykól aýylynyń irgesinde uıymdastyrylmaq.
Jaıyq jaǵasynda ótetin alaman báıgege barlyq júırik tuqymdar qosylady. Elimizdiń 14 oblysy jáne Nur-Sultan, Almaty, Shymkent qalalarynyń árqaısysynan 5 sáıgúlikten qatysady. Júlde qory – 22 mıllıon teńge. Bas júlde – 10 mıllıon. Shylbyr ustatqan alǵashqy toǵyz júırikke júlde beriledi.
Atyraý ólkesinde besinshi márte uıymdastyrylatyn bıylǵy aıtýly alamanǵa elimizdiń eń tańdaýly jetpisten astam sáıgúlikteri baq synaıdy dep kútilýde. Bir qyzyǵy, 2015 jyly jáne 2017 jyly «Altyn tulparda» eki ret bas báıge alǵan Samal sáıgúliktiń, sondaı-aq 2017 jylǵy alamanda ekinshi oryn alǵan jetisýlyq júırik Qoıanqasqanyń atbegileri baby kelisken tulparlarynyń baǵyn Atyraý topyraǵynda taǵy bir synap kórmekke bekinipti. Sondyqtan bilikti mamandar pikirinshe Jaıyq jaǵasynda ótetin «Altyn tulpar» báıgesiniń bul jolǵy básekesi tipti erekshe bolmaqshy.
