Álem birinshilikterinde qazaqstandyq sportshylar boks boıynsha 1 altyn, 1 kúmis jáne 4 qola medal; kúres túrleri boıynsha 3 kúmis, 4 qola medal jáne aýyr atletıka boıynsha 1 kúmis medal ıelendi.
Jarystardyń qorytyndysy jáne Tokıoda ótetin Olımpıada oıyndaryna daıyndyq týraly Mádenıet jáne sport vıse-mınıstri Eldos Ramazanov, Ulttyq Olımpıada komıtetiniń hatshysy Sáken Musaıbekov, Sport jáne dene shynyqtyrý isteri komıtetiniń tóraǵasy Serik Sápıev, sondaı-aq, ulttyq qurama komandalardyń bas trenerleri baıandady.
E. Ramazanovtyń aıtýynsha, búginde Qazaqstannyń qorjynynda 9 sport túri boıynsha 20 lısenzııa bar, Olımpıadaǵa keminde 100 lısenzııa jeńip alý josparlanǵan.
«Nátıjeler kóńil kónshiterlik emes. Boks boıynsha jalpykomandalyq úshinshi oryndy aldyq, aýyr atletıka boıynsha – 12-shi, kúres boıynsha – 14-shi oryndamyz. Tek boksshylardyń jalǵyz altyn medali bar. Mınıstrlik, Ulttyq Olımpıada komıteti, federasııalar men demeýshiler jetkilikti qoldaý kórsetip otyr. Onda nege nátıje joq? Beıindi mınıstrlik bul jumysty durys úılestire almaı otyr. Sport – bútin bir eldiń ımıdji. Tokıoda ótetin Olımpıada oıyndarynda jaqsy nátıjeler kórsetý úshin qatelermen jumys isteńizder. Ýaqyt az qaldy», dedi B. Saparbaev.
Sonymen qatar vıse-premer sportshylardy jarystarǵa irikteý kezinde ashyqtyq pen obektıvtiliktiń jetispeıtinin aıtty.
«Sportta jeń ushynan jalǵasý, alalaý eshqashan bolmaýy tıis! Bizdiń elimizdiń abyroıyn úzdik sportshylar qorǵaýy kerek. Buqaralyq sportty damytyp, kásibı sportshylardyń jas urpaǵyn daıyndaý kerek. Bizdiń materıaldyq-tehnıkalyq bazamyz jaqsy, sondyqtan, ásirese, óńirlerde sporttyq qurylymdardy barynsha tıimdi paıdalaný qajet», dep túıindedi ol.
