Golovkınniń salmaǵy 159,2 fýnt (72,21 kılogramm) boldy. Al Derevıanchenko 159 fýnt (72,12 kılogramm) tartty. Orta salmaqtyń shekti kórsetkishi — 160 fýnt, ıaǵnı 72,574 kılogramm.
Qos boksshy bul kezdesýde orta salmaqta IBF jáne IBO nusqalary boıynsha álem chempıony beldigin sarapqa salady. Jekpe-jek erteń AQSh-tyń Nıý-Iork qalasynda áıgili «Madison Square Garden» arenasynda ótedi. Sondaı-aq bul boks keshinde taǵy bir qazaqstandyq boksshy — Álı Ahmedov (15-0, 11 KO) amerıkalyq Endrıý Ernandespen (20-7-2, 7 KO) qolǵap túıistiredi. Ol da salmaq ólsheý rásiminen ótip, qarsylasymen kóz arbasty.
Jekpe-jekterdi «Qazaqstan» jáne «Qazsport» arnalary tikeleı efırde usynady. Translıasııa Nur-Sultan ýaqyty boıynsha 6 qazan kúni 05:00-den bastalady.
