Azamattardyń ótinishi jaýapsyz qalmaýy kerek

MÁMS júıesi engizilgen alǵashqy óńir

Talqylaýǵa salynǵan negizgi ta­qyryp – ózin ózi jumyspen qamtyǵan ha­lyqtyń mártebesin ózektendirý, túsin­dirý jumystaryn júrgizý jáne min­detti áleýmettik medısınalyq saqtan­dyrýdy engizý aıasynda saqtandyrý aýdarymdarynyń ýaqtyly júzege asyrylýyn qamtamasyz etý máseleleri boldy.

«Eń bastysy, halyqtyń mártebesin ózektendirý. Bizde jaqsy tájirıbe bar, alaıda kemshilikterdi de jasyrýǵa bolmaıdy. Jyl sońyna deıin mártebesi áli anyqtalmaǵan barlyq adamdardy qamtý kerek. Árbir qazaqstandyq bul júıeniń qalaı jumys isteıtinin, ásirese aýyldyq jerlerde medısınalyq kómekti qalaı ala alatynyn bilýi tıis. Tólemderdiń ýaqtyly jasalýy máselesin de sheshý qajet. Salyq organdary salyqty jáne mindetti áleýmettik tólemderdi, onyń ishinde MÁMS tóleýdi baqylaýdy jáne jumysty kúsheıtýi tıis. 2020 jyldyń 1 qańtarynan bastap MÁMS-ti iske qosý boıynsha Elbasy men Prezıdenttiń tapsyrmalary bar. Merzimder aýystyrylmaıdy. Barlyq óńirler jyl sońyna deıin daıyn bolýy tıis», dedi Berdibek Saparbaev.

Jalpy vıse-premer atap ótkendeı, medısınalyq saqtandyrýdy engizýge daıyndyq joǵary. Qaraǵandy oblysynda MÁMS aprobasııasynyń alǵashqy aıy densaýlyq saqtaý júıesiniń kelesi jyldan bastap el boıynsha medısınalyq saqtandyrýdy aýqymdy túrde engizýge daıyn ekenin kórsetti.

Sonymen qatar MÁMS júıesine qoldaý retinde densaýlyq saqtaý júıesiniń ardagerleri joǵary sanatty dáriger, medısına ǵylymdarynyń doktory, professor Abaı Baıgenjın jáne burynǵy Densaýlyq saqtaý mınıstri, medısına ǵylymdarynyń doktory Jaqsylyq Dosqalıev óz pikirlerin bildirdi.

«Bizdiń sanamyzǵa keńes zamanynan beri memleket medısınalyq qyzmetterdi tóleýge, qymbat otalardy tegin júrgizýge, dári-dármekterdi tegin berýge tıis degen pikir berik ornap qalǵan. MÁMS adamdardy óz densaýlyǵyna jaýapkershilikpen qaraýǵa úıretedi. Azamattar ózderiniń densaýlyǵyna jaýapty ekenin túsinýi tıis. MÁMS engizý densaýlyq saqtaý salasyn resýrstyq qamtamasyz etýdi aıtarlyqtaı arttyrýǵa, medısınalyq mekemeler men qyzmetkerlerdiń ekonomıkalyq qyzyǵýshylyǵyn arttyrýǵa múmkindik beredi, densaýlyq saqtaýdy barynsha ıkemdi jáne tıimdi qarjylandyrýǵa jol ashady», dep esepteıdi Abaı Baıgenjın.

Keńes qorytyndysy boıynsha Ber­dibek Saparbaev medısınalyq saqtandyrý júıesin engizý, halyqtyń mártebesin ózektendirý jáne halyqty aqparattandyrý boıynsha jumysty jalǵastyrýdy tapsyrdy.

«Life In» ońaltý ortalyǵyn jáne «Mı­ras» klınıkasyn aralaý barysynda Ber­dibek Saparbaev sıfrlandyrý júıe­siniń engizilýimen, medısınalyq qyz­metterdiń sapasymen, sondaı-aq klınıka qyzmetkerlerin qarjylyq qamtamasyz etý deńgeıimen tanysty.

Qaraǵandy oblysy – qanatqaqty rejimde mindetti áleýmettik medısınalyq saqtandyrýdy engizgen alǵashqy óńir. Bul júıe osy jyldyń 1 qyrkúıeginde iske qosyldy, al elimizdiń basqa óńirlerinde ony 2020 jyldyń 1 qańtarynda engizedi. Búgingi tańda Qaraǵandy oblysynda turǵyndarynyń 81%-da MÁMS júıe­sin­degi mártebesi anyqtaldy.

Mobıldi jumyspen qamtý ortalyǵy

Berdibek Saparbaev sondaı-aq mo­­bıldi Jumyspen qamtý ortalyq­tarynyń tájirıbesimen tanysty. Qara­ǵan­dylyqtar elimizde birinshi bolyp iri bazarlar men vokzaldar sekildi adam kóp shoǵyrlanatyn jerlerde jumysqa ornalastyrý pýnktterin qurdy. Jumys izdep júrgen adamdar bos oryndarmen tanysyp, birden jumys berýshige joldama ala alady nemese kásibı kýrstarǵa jazyla alady. Mamandar azamattarǵa óz isin ashý múmkindikteri týraly aıtyp, memlekettik qoldaý sharalary týraly keńes beredi.

Oblys ortalyǵynda alǵash ashylǵan mobıldi Jumyspen qamtý ortalyǵy kún saıyn myńdaǵan adam ótetin «Shyǵys» bazarynyń aýmaǵynda ornalasqan. Vıse-premerdi ortalyq jumysynyń júıeliligi men tıimdiligi qyzyqtyrdy. Osyndaı mobıldik jumyspen qamtý ortalyqtary oblystyń basqa qalalary men aýdandarynda jumys isteıdi. Olardyń jalpy sany – 11. Sonymen qatar 13 jyljymaly jumyspen qamtý pýnkti bar.

Bıyl óńirde 25 myńnan astam adam jumyspen qamtyldy. Memlekettik jumyspen qamtý baǵdarlamasynyń barlyq tetikteri iske qosyldy. Jastar tájirıbesine 2321 adam jiberildi. «Bastaý Bıznes» jobasy boıynsha kásipkerlik negizderine 1300-den astam adam oqy­tyldy. Kýrs túlekteri jobalardy iske asyrýǵa 957 shaǵyn nesıe aldy.

Jyl basynan beri oblysta 30 700-den astam jańa jumys orny ashyldy, onyń ishinde árbir úshinshisi ‒ turaqty.

Jastarmen júzdesti

Premer-Mınıstrdiń orynbasary sonymen qatar óńirdiń belsendi jastarymen kezdesti. Basqosý Qaraǵandy memlekettik tehnıkalyq ýnıversıtetinde ótti. Jastar vıse-premerge ózderiniń alǵashqy tabys­tary týraly áńgimeledi.

«Jastar – qoǵamnyń qozǵaýshy kúshi. Ár adam jastardyń bolashaǵy jaqsy bolǵanyn armandaıdy. Bizdiń maqsatymyz – jastarǵa damý úshin jaǵdaı jasaý. Jastar jyly, aldaǵy eriktiler jyly jáne Prezıdenttik kadrlyq rezervke qabyldaý – bul qadamdardyń barlyǵy elimizde jastardyń óz maqsattaryn jú­ze­ge asyryp, armandaryna qol jetkize ala­ty­nyn bildiredi», dedi Berdibek Sapar­baev.

Qazaqstanda Jastar jylynda 89 iri is-shara júzege asyrylyp jatyr, turǵyn úı problemasyn sheshý boıynsha da sharalar ázirlendi, jas kásipkerler de qoldaýǵa ıe bolǵan. Kezdesýge stýdentter, jas kásipkerler, jumysshylar, sportshylar, eriktiler jınaldy. Jas kásipker Birjan Imanov, «Eńbek» baǵdarlamasynyń qaty­sýshysy Aleksandr Konsevıch bıznestegi alǵashqy qadamdary týraly aıtyp berdi. 

Premer-Mınıstrdiń orynbasary Berdibek Saparbaev pen Qaraǵandy obly­synyń ákimi Jeńis Qasymbek óńir jurt­shylyǵymen kezdesti. Vıse-premer «Syndarly qoǵamdyq dıalog – Qa­zaqstannyń turaqtylyǵy men órken­deýiniń negizi» atty Joldaýynda el Prezı­dentiniń alǵa qoıǵan mindetterin iske asyrý jónindegi sharalar týraly aıtyp berdi.

Kezdesýge sondaı-aq Densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Eńbek jáne halyqty áleýmettik qorǵaý mınıstri Birjan Nurymbetov qatysty.

«Qoǵamdyq kelisim bolǵan kezde oń nátıje de, ál-aýqat ta, gúldený de bolady. Prezıdent Qasym-Jomart Toqaev bul máselege úlken nazar aýdarady. Bul memleket pen qoǵamnyń arasyndaǵy dıalogqa qatysty. Munda úkimettik emes uıymdardyń áleýetin tartý kerek. El Úkimeti eki tujyrymdamany ázirleýde: «tyńdaýshy memleket» jáne azamattyq qoǵamdy damytýdyń 2025 jylǵa deıingi tujyrymdamasy. Bul qujattar jyldyń sońyna deıin daıyn bolýy tıis. Onda ashyq úkimet jáne halyqpen tıimdi keri baılanys máseleleri qozǵalady. Azamat­tardyń birde-bir ótinishi men shaǵymy jaýapsyz qalmaýy kerek», dedi Berdibek Saparbaev.

Vıse-premer qoǵamdyq keńesterdiń qyzmetin kúsheıtý qajettigin atap ótti. Da­ryndy balalardy qoldaý kartasy, balalar múddesin qorǵaıtyn 2030 jylǵa deıingi memlekettik saıasat tujyrymdamasy ázirlenedi. 2019 jyldyń sońyna deıin jı­naqtardyń kiristiligin arttyrý maq­satynda zeınetaqy aktıvterin ınvestısııalaý tásilderin qaıta qaraý josparlanyp otyr.

Balalardyń bos ýaqytyn uıymdastyrý kerek

Sonymen qatar Premer-Mınıstrdiń orynbasary Berdibek Saparbaev G.Golov­kın atyndaǵy qaraǵandylyq sport keshe­ninde boldy. Onda jas sportshylar GGG qoldaý maqsatynda fleshmob ótkizdi. 6 qazanda Nıý-Iorktiń belgili arena­synda álemge áıgili qaraǵandylyq Genna­dıı Golovkın ýkraınalyq Sergeı Dere­vıanchenkomen jekpe-jek ótkizgeni belgili. Bylǵary qolǵap sheberleriniń shaıqasynda báıgege IBF jáne IBO nusqalary boıynsha orta salmaqtaǵy álem chempıony ataǵy tigilip, jerlesimiz upaı sanymen jeńiske jetti.

Vıse-premer aýyr atletıka, kúres, basketbol zaldaryn jáne júzý basseınin aralap kórdi.

QARAǴANDY