Esterińizge sala keteıik, Ulytaý halyqaralyq deńgeıdegi etnografııalyq týrızmniń ortalyǵyna aınalýy tıis. Bul týraly Qasym-Jomart Toqaev «Ulytaý – 2019» halyqaralyq týrıstik forýmynda aıtty.
– Týrızmdi damytý úshin Mádenıet jáne sport mınıstrligi memlekettik baǵdarlama ázirleýde. Ol Altyn Ordanyń 750 jyldyǵyn merekeleýge arnalǵan kóptegen týrıstik is-shara ótkizýdi kózdeıdi. Qazirgi ýaqytta basty mindet – arnaıy týrıstik tujyrymdamany ázirleý. Bul baǵyttaǵy jumystar jóninde Mádenıet jáne sport vıse-mınıstri Nurǵısa Dáýeshov aıtyp ótti.
Berdibek Saparbaev sondaı-aq aýdan ortalyǵyndaǵy týrıstik sapar-ortalyq qurylysynyń barysymen tanysty. Jospar boıynsha munda týrısterge arnalǵan 15 oryndyq qonaqúı úlgisindegi jataqhana, murajaı, 2 konferens-zal, ashana bolady. Premer-Mınıstrdiń orynbasaryna sondaı-aq óńirdiń tarıhı-mádenı oryndary boıynsha týrıstik baǵyttar, tarıhı eskertkishterdi qalpyna keltirý jumystary, buryn ótkizilgen týrıstik is-sharalar usynyldy.
Berdibek Saparbaev Ulytaý aýdanynyń ólketaný murajaıynyń qurylysymen tanysty. Joba boıynsha ǵımarat 2 qabattan turady, onyń alańy 830 sharshy metr. Qazir negizgi qurylys jumystary aıaqtalýda, qazandyq ornatý, ishki jáne syrtqy óńdeý jumystary júrip jatyr.
Vıse-premer mádenıet jáne sport mınıstrligine, oblys jáne aýdan ákimdigine sapar ortalyǵy men murajaıdyń jumysyn tıimdi paıdalaný jáne uıymdastyrý, jergilikti turǵyndardy qurylys-montaj jumystaryna tartý jóninde usynystar daıyndaýdy tapsyrdy.
Berdibek Saparbaev sondaı-aq aýdandyq emhanada boldy. Kelesi jyly onyń janynda aýdandyq ortalyq aýrýhananyń qurylysy bastalady. Búgingi kúni qurylys úshin jer telimi bólinip, qarajat qarastyrylǵan. Aýdany 2000 sharshy metr bolatyn aýrýhananyń 3 qabatty ǵımaratynyń qurylysy kelesi jyly bastalyp, 2021 jyly aıaqtalýy tıis.
«Egemen-aqparat»
