Muǵalimniń áleýmettik jaǵdaıy dóńgelek ústel májilisinde talqylandy

Ustazdar kúnine oraı ótki­zilgen dóńgelek ústel jumysyn mo­derator, saıasattanýshy Erlan Saırov bilim berý salasy qyz­metkerlerin kásibı merekesimen quttyqtaýdan bastady. «Álem qazir kún saıyn ózgerip, jańa bir tehnologııalyq deńgeıge kóterilip kele jatyr. Al jańa zamanǵa laıyq tulǵalardy muǵalimder qalyp­tastyrady. Olardyń áleýmet­tik mártebesin kóterý másele­leri Memleket basshysy Qasym-Jomart Toqaevtyń halyq­qa Joldaýynda qamtyldy. Biraq budan da mańyzdysy – úndeýdegi tapsyrmanyń oryndalýy, iske asyrylýy», degen E.Saırovtyń oıynsha, muǵalimder aılyǵynyń 25 paıyzǵa kóbeıýi, synyp jetekshiligi men dápter teksergeni úshin beriletin qosymsha aqy, sondaı-aq demalys kúnderiniń uzar­tylýy pedagogtardyń áleý­mettik mártebesin arttyrýǵa jaǵdaı jasaıdy.

Jıynda sóz alǵan Bilim jáne ǵylym vıse-mınıstri Rústem Aıdarbekuly jańadan ázirlenip, qazir Parlament qabyrǵasynda qaralyp jatqan «Pedagog mártebesi týraly» zań jobasynda muǵalimderdi yntalandyrý, jaýapty jumysyn baǵalaý maqsatynda «Qazaqstannyń eńbek sińirgen ustazy» ataǵy beriletinin atap ótti. Mınıstrlik ókili sonymen qatar keler jyldan bastap magıstr dárejesi bar pedagogtarǵa 10 aılyq eseptik kórsetkish kóleminde qosymsha aqy tólenetin jańa norma kúshine enetinin aıtty. R.Aıdarbekulynyń keltirgen deregine sáıkes, qazir mektepterde jumys isteıtin magıstrlerdiń sany tym az, ıaǵnı bar-joǵy 5 myń ǵana bolyp tur. Vıse-mı­nıstr muǵalimder mektepte sheber­ligimen birge ózderiniń biliktiligin de arttyryp, ǵylym salasyn damytýǵa úles qosýy qajet.

Al qazaqstandyq salalyq bilim jáne ǵylym qyzmetkerleri kásipodaǵy tóraıymynyń orynbasary Aıgúl Maqsatqyzy atal­ǵan jańa zań jobasyn ázirleý barysynda qaralǵan pedagogtar usynystarynyń 90 paıyzy zeınetkerlik jastyń qysqar­ty­lýyna baılanysty bolǵany­na toqtaldy. «Biz bul usynys­ty kásipodaq uıymy retinde qol­daımyz. Árıne, usynystyń qol­daý tabýy eldiń ekonomıkalyq jaǵ­daıyna baılanysty bolady. Biraq biz jańa zań jobasyn qa­byldaıtyn bolsaq, ustazdar­dyń mártebesi qoǵam aldynda bıik ekenin jalaqysynyń jo­ǵary bolýymen jáne zeınetke erterek shyǵý quqyǵyn berý arqyly kórsetýimiz kerek. Ustaz mártebesi – ult mártebesi. Sebebi el bolashaǵy osy bir qaýymnyń qolynda bolmaq», deıdi.