Saladaǵy jaǵdaı týraly Qazaqstan Respýblıkasynyń ındýstrııa jáne ınfraqurylymdyq damý mınıstri B. Atamqulov, «Samuryq-Qazyna» kólik jáne logıstıka jónindegi basqarýshy dırektory Q. Alpysbaev, Qazaqstan Respýblıkasynyń energetıka mınıstri Q. Bozymbaev, «Eır Astana» AQ prezıdenti P. Foster baıandady.
Qazaqstanda jolaýshylardy avıa tasymaldaý kólemi ósýde — osy jyldyń 8 aıynda azamattyq avıasııada 5,6 mln jolaýshy tasymaldandy, bul ótken jyldyń sáıkes kezeńimen salystyrǵanda 1,8%-ǵa artyq.
Ushý geografııasy keńeıtilip jatyr — Qazaqstan 99 halyqaralyq baǵytta 24 shet elmen áýe qatynasyn júzege asyrady, sonyń ishinde 2019 jyly Nur-Sultannan Tokıoǵa, Pragaǵa, Ulan-Batyrǵa baǵdarlar ashyldy. 9 álemdik qarjy ortalyqtarymen turaqty áýe qatynasy ornatylǵan.
Avıa bıletterdiń baǵasyn tómendetý maqsatynda arzan baǵaly áýe kompanııasy – «FlyArystan» loýkosteri ashyldy, onda osy jyldyń mamyr aıynan bastap 450 myńnan astam bılet satyldy, olardyń 60%-ǵa jýyǵy 10 myń teńgege deıin mınımaldy tarıfter boıynsha satylǵan. Jaqyn ýaqytta Nur-Sultannan Pavlodar, Semeı jáne Shymkent qalalaryna bılet baǵasy 5999 teńgeden bastalatyn jańa reıster ashylady. Pavlodarǵa opsıondyq tarıfter 999 teńgeden bastap satylýda. 2020 jyldyń sońyna deıin loýkoster Máskeýge halyqaralyq baılanystar asha otyryp, kóptegen óńir ortalyqtaryna ushatyn bolady.
«Samuryq-Qazyna» kólik jáne logıstıka jónindegi basqarýshy dırektory Q. Alpysbaevtyń aıtýynsha, «FlyArystan»-nyń ortasha tarıfi 1 km-ge Eýropalyq loýkosterler tarıfterinen 4 esege tómen.
Bıyl qazaqstandyq MО́Z-derdi jańǵyrtýdyń arqasynda avıasııalyq otyn óndirý kólemi 2018 jylǵy óndirispen salystyrǵanda 694 myń tonnaǵa nemese 1,8 esege ósti. Bul otandyq munaı óńdeý zaýyttary esebinen ishki naryqtyń qajettilikterin tolyq qamtamasyz etýge múmkindik beredi.«Halyqty sapaly, qaýipsiz jáne qoljetimdi avıa qyzmettermen qamtamasyz etý – Elbasy men Memleket basshysynyń bizdiń aldymyzǵa qoıyp otyrǵan mańyzdy mindetteriniń biri», — dedi A. Mamın.
Premer-Mınıstr 2020 jyly Shanhaı men Sıngapýrǵa reıs ashý boıynsha jumysty jalǵastyrýdy, sondaı-aq, Nıý-Iorkke ushý úshin otandyq avıakompanııalardy akkredıtteý rásimin aıaqtaýdy, osy jyldyń sońyna deıin Qostanaı jáne Balqash áýejaılarynyń ushý-qoný jolaǵynyń rekonstrýksııasyn aıaqtaýdy, belgilengen merzimde Túrkistandaǵy áýejaı qurylysy men Shymkenttegi termınal qurylysyn aıaqtaýdy, óńirlerde shaǵyn avıasııa men aerodromdardy damytý jónindegi baǵdarlamany ázirleýdi jáne qabyldaýdy jedeldetýdi tapsyrdy.
Úkimet basshysy otandyq áýejaılarda sheteldik avıakompanııalar úshin «ashyq aspan» rejımin usyný jumysyn belsendi júrgizýdi tapsyrdy, bul jańa sheteldik avıakompanııalardy tartýǵa, baǵyttardy kóbeıtýge, avıakompanııalar arasyndaǵy básekelestikti arttyrýǵa múmkindik beredi. Al bul tıisinshe avıabılet qunynyń tómendeýine áser etedi. Bılet baǵasynyń 20%-nan astamyn avıa otyn shyǵystary quraıtyny belgili, sondyqtan ulttyq ekonomıka, energetıka, ındýstrııa jáne ınfraqurylymdyq damý mınıstrlikterine avıakerosınge baǵa belgileý máselesin pysyqtaý tapsyryldy.
Premer-Mınıstr «Samuryq-Qazyna» qoryna 2020 jyly memlekettik holdıngtiń basqarýyndaǵy avıakompanııalardyń áýe kemeleri parkin ulǵaıtýdy jáne olardyń ushý geografııasyn keńeıtýdi qamtamasyz etýdi tapsyrdy.«Kórip otyrǵanymyzdaı, avıabıletter baǵasyn tómendetýge baǵyttalǵan jumys nátıjelerin berýde. Bul jumysty barlyq otandyq avıakompanııalarmen birlesip jalǵastyrý qajet», — dep túıindedi A. Mamın.
