Jańaózen qalasynyń eki jasar turǵyny Abylaıhan Satybaldy oınap otyryp aýzyndaǵy emizikti jutyp qoıǵan. Shashalǵan balany ata-anasy shuǵyl Mańǵystaý oblystyq balalar aýrýhanasyna jetkizedi. Al bul kezde toqtaýsyz qusyp, álsiregen baldyrǵannyń denesi qurǵaı bastaǵan bolatyn.
Aqtaý qalasyndaǵy balalar aýrýhanasyna jetkizilgen boıda dárigerler balany rentgenge túsirip, ishekte kedergi baryn anyqtap, shuǵyl endoskopııalyq ota jasaıdy. Mańǵystaý oblystyq kópbeıindi balalar aýrýhanasy travmotologııa-ortopedııa bóliminiń meńgerýshisi, joǵary sanatty balalar hırýrgi Qurman Qaıranovtyń aıtýynsha, alǵashynda dıagnoz qoıý qıyn bolǵan, sebebi rentgenge túsirgende emizik kórinbegen, alaıda ishek ótkizbeýshiliginiń belgisi bolǵan.
Eger de ata-ana ýaqtyly dárigerge habarlaspaǵanda balanyń eksıkozǵa túsip ketýi múmkin edi, sebebi tamaq pen sý ishpegen jaǵdaıda dene qurǵap ketedi, nátıjesinde álsizdik paıda bolady. Bul jerde eń bastysy bala ýaqytynda jetkizilip, oǵan jedel kómek kórsetildi. Imfýzııalyq em taǵaıyndaldy. Búginde endoskopııalyq hırýrgııanyń damyǵany sonshalyq, úlken kesindi jasamaı jáne ishki qurylysyn ashpaı, ishine kirip qajetti kómek jasalyp otyr.
– Aýrýhanaǵa alǵashqy túsken kezi aýyr deýge bolady. Sebebi ishken astyń barlyǵyn keri qaıtaryp jatty. Bozaryp, tamaq pen sý ishe almaǵasyn shóldegeni sonshalyq balanyń denesi qurǵaı bastaǵan. Ata-anasynyń ruqsatyn alyp, ota jasaldy. Ota sátti aıaqtaldy, balanyń qazirgi jaǵdaıy jaqsy, tamaq pen sýsyn iship jatyr. Meniń 21 jyldyq tájirıbemde osyǵan uqsas jaǵdaılar bolyp turatyn. Kóbine tıyn, plastıkalyq kishkentaı oıynshyq, juldyzshany jutyp qoıǵan balanyń óńeshinen alyp júrmiz, – deıdi dáriger Q.Qaıranov.
Qıyn jaǵdaıdy boldyrmas úshin dárigerler ata-analar balaǵa muqııat bolsa degendi aıtady, ásirese kishkentaı balanyń árbir qımylyn qadaǵalaǵan durys.
Qazir «emizik jutqan erdiń» jaǵdaıy jaqsy, densaýlyǵyna tónip turǵan qaýip joq. Endi eki jasar Abylaıhan Satybaldy úıine jiberilmek.
Mańǵystaý oblysy
