Júgirýdiń paıdasy týraly bárimizge belgili, biraq, onyń sport ekenin esten shyǵarmaǵan abzal. Kez kelgen sporttyq jattyǵý tárizdi júgirý de muqııat daıyndyq pen durys tehnıkany qajet etedi. Júgirýdi jańadan bastaǵandar nemese oǵan uzaq ýaqyt boıǵy úzilisten soń kiriskender jıi jaraqattanady. Kópten kútken marafonǵa oıdaǵydaı qatysý úshin densaýlyqqa qazirden bastap kóńil bólgen jón, deıdi dárigerler. Sonymen mamandar tómendegideı keńes beredi:
Neden bastaý kerektigin bilmeseńiz, aldymen terapevtke baryp, beıindi dárigerlerge joldama alyp, olardyń usynymdaryna qulaq asyńyz. Mindetti túrde dárigerge uzaq qashyqtyqqa júgirýdi josparlap otyrǵanyńyzdy eskertý qajet.
Júgirýge bir kún qalǵanda …
О́z hal-jaıyńyzdy qadaǵalańyz. Sýyq tııý, syrqattaný, ýlaný oryn alsa, júgirýge qatyspaǵan jón. Árıne, bul ókinishti. Degenmen, ózińizdi jaısyz sezinseńiz, marafonǵa jankúıer retinde ǵana kele alasyz.
Sóre aldynda jaqsy uıyqtap, tynyǵý qajet.
Jarys aldyndaǵy túni alkogol ishimdikterin paıdalanýǵa múldem tyıym salynady.
Álemdik dástúrge saı, marafon aldynda pasta-patı uıymdastyrýǵa bolady. Baıaý kómirsýlar júgirý kezinde aǵzaǵa qajetti qýat qoryn qalyptastyrady.
Tańerteń jarys aldynda …
Energetıkalyq sýsyndardy shekten tys paıdalanbańyz.
Marafon ótetin kúni kómirsýlardy sóre bastalar aldynda 3 saǵattan keshiktirmeı, al sońǵy asty jarys bastalýǵa 1,5-2 saǵat qalǵanda ishýge keńes beriledi. Júgirý aldynda shóldeseńiz, 1 nemese 2 stakan sý ishý qajet.
Jarys aldynda shynyǵyp, tize, taban, keýde, moıynǵa jattyǵý jasaǵan durys.
Jeńil kúrteshe nemese plash kıseńiz, jarystyń bastalýyn kútip turǵanda tońbaısyz.
Júgirgen kezde …
О́z kúshińizdi birqalypty jumsańyz. Sharshasańyz, baıaý júgirýge kóshińiz. Alaıda, toqtamaı, márege deıin júrýdi jalǵastyryńyz.
Jaz mezgili bolmaǵandyqtan, máreden keıin birden jyly qurǵaq kıim kıińiz.
Bastysy, ózińizdi jaqsy sezinseńiz bolǵany. О́z deneńizge kóńil bólip, shekten tys kúsh salmańyz. Birinshi kezekte siz ózińiz úshin, sodan keıin ǵana jeńimpaz ataǵyna ıe bolý úshin júgiresiz.
Trassada medısınalyq kómek kórsetý
Marafon kúni júgirýshilerdiń hal-jaıy men qaýipsizdigin jedel medısınalyq járdem stansııalarynyń brıgadalary men velomedıkteri qadaǵalap, baǵdar boıynsha kardıologııalyq ortalyq qyzmetkerleriniń medısınalyq shatyrlary ornatylady. Sonymen birge Almaty jartylaı marafonyna daıyndyq aıasynda Qazaq-Reseı medısınalyq ýnıversıtetiniń (QRMÝ) 30-dan astam erikti stýdenti Qazaqstan Qyzyl Jarty Aı qoǵamynda dárigerge deıingi alǵashqy medısınalyq kómek negizderin aqysyz oqydy. Trassanyń ár shaqyrymynda Qyzyl Jarty Aı qoǵamynyń eriktileri jáne daıyndyqtan ótken erikti stýdentter kezekshilik etedi.
Marafondy «Birinshi bolý – batyldyq» korporatıvti qory, «World Class Almaty» fıtnes-klýby, Sh.Esenov atyndaǵy ǵylymı-bilim berý qory jáne mýltısporttyq #Seniń basqa qyryń Youtube-kanaly uıymdastyrady.
