Sapar ejelgi Bozoq qalashyǵy men kıeli jer – Qumaı-Qaraǵaıly baǵyty boıynsha jasaldy. Elordalyq Dostyq úıi alańynan jınaqtalyp, jolǵa shyqqan top Nur-Sultan qalasy aýmaǵynan Bozoqty ózeniniń shyǵys jaǵalaýyna, Esil ózeninen ótetin dástúrli ótkel – Qaraótkelden ońtústik-shyǵysqa qaraı 5 shaqyrym qashyqtyqta ornalasqan Bozoq qalashyǵyna at basyn tiredi. Qazirgi kezde bul arheologııalyq nysannyń aýmaǵy Nur-Sultan qalasynyń sheńberinde jatyr. Ekskýrsııany K.Aqyshev atyndaǵy arheologııalyq ǴZI dırektory, tarıh ǵylymdarynyń doktory, professor Maral Habdýlına bastap otyrdy. Ol qatysýshylarǵa Bozoq qalashyǵyn zertteý týraly hronologııalyq kesteni túsindirip, akademık K.Aqyshevtiń alǵashqylardyń biri bolyp Bozoq qalashyǵyn mýzeıge aınaldyrýǵa usynys jasaǵanyn atap ótti.
«Bozoq jóninde arheologtar birneshe maýsym dalalyq qazba jumystaryn júrgizdi. Osy ýaqytqa deıin birshama kitap, zertteý eńbekteri de jazyldy. Mýzeı ashý týraly osyǵan deıin biraz quzyrly oryndarǵa júgindik. Mine, endi sáti túsip, jumystar bastalyp jatyr. Arheologtardyń talpynysy júzege asyp, úmiti aqtalýda. Bolashaq urpaq úshin tarıhymyzdy tereńdeı tanyp-bilý óte mańyzdy. Sizder kórip turǵan bul jerler birneshe aıdan soń ashyq aspan astyndaǵy erekshe mýzeıge aınalmaq», dedi Maral Qalymjanqyzy óz sózinde.
Tarıhı-mádenı mura, ortaǵasyrlyq qala oryndaryna saıahat jasaǵan ekskýrsııa qatysýshylary tarıhy tereńde jatqan Bozoqpen keńirek tanysty. Jumys barysynda Nur-Sultan qalasy Qazaqstan halqy Assambleıasy, etnomádenı birlestikter músheleri jáne elordalyq QHA jastary tazalyq aksııasyna óz úlesterin qosty. Barlyǵy birige ejelgi qalashyq ornyn qoqystan tazartty. Adal eńbekten soń, qatysýshylar uıymdastyrýshylar usynǵan taza aýadaǵy túski astan dám tatty. Kelesi kezekte Nur-Sultan qalasynan 120 shaqyrymdaı jerde ornalasqan Qumaı arheologııalyq-etnografııalyq qorym eskertkishine jol bastaldy.
Aqmola oblysynyń Ereımentaý aýdany Jylandy taý jotasynyń eteginde jatqan bul qorym 2009 jyly tabylǵan. Qumaı ózeniniń sol jaǵalaýyndaǵy alqapta radıýsy 3-7 shaqyrym aýmaqta jatqandyqtaryna baılanysty bul qorymdar ǵylymı aınalymǵa da osy ataýmen engizilgen eken. Elordalyq QHA jastary professor Maral Habdýlınanyń eskertkishter týraly tolyqqandy ǵylymı-tanymdyq maǵlumattaryna sýsyndap, kókeıdegi suraqtaryna jaýap aldy. Tarıhı nysandardy aralap kórip, asyl muramyzdy odan ári qadirleı túsýine sebepshi bolǵan uıymdastyrýshylarǵa qatysýshylar atynan zor alǵys bildirildi.
Jumys kúni «Aqmola oblysynyń kıeli nysandary» atty K.Aqyshev atyndaǵy arheologııalyq ǴZI aǵa ǵylymı qyzmetkeri Danııar Tileýǵabylovtyń dárisimen Qoıandy aýylynda aıaqtaldy.
