Zań jobasynda «bir úı – bir múlik ıeleriniń birlestigi» qaǵıdaty boıynsha kommersııalyq emes «múlik ıeleriniń birlestigi» uıymyn qurý arqyly kondomınıým nysanyn basqarýdyń jańa úlgisi usynylady.
Kondomınıým nysanynyń ortaq múlkin kúrdeli jóndeýdi qarjylandyrý tetigi engiziledi.
Sondaı-aq basqarý organdary qyzmetiniń ashyqtyǵyn arttyrýǵa jáne úı-jaılardyń menshik ıeleriniń tarapynan kondomınıým nysanyn basqarý organyna baqylaýdy qamtamasyz etýge baǵyttalǵan erejer usynylady.
Tolyq emes (ishinara) bloktarǵa qatysty paıdaly qatty qazbalardy barlaýdy lısenzııalaý, keń taralǵan paıdaly qazbalardy barlaýǵa nemese óndirýge ruqsat berý bóligindegi erejeler retteledi, sondaı-aq óndirý jónindegi operasııalarǵa arnalǵan jyl saıynǵy eń tómengi shyǵystar mólsheri azaıtylady.
Senatorlar turǵyn úı-kommýnaldyq sharýashylyǵy, kondomınıýmnyń ortaq múlkine kúrdeli jóndeý júrgizýdi qarjylandyrý, jer resýrstaryn tıimsiz paıdalaný jáne taǵy basqa salalardaǵy ózekti máselelerdi kóterdi.
Edil Mamytbekov turǵyn úı salasynyń damý deńgeıi halyqaralyq standarttar men talaptarǵa sáıkes kelmeıtinin, ol halyqtyń ómir súrý sapasynyń tómendeýine áser etetinin atap ótti.
«Qazaqstan Prezıdenti Qasym-Jomart Toqaevtyń elordany damytý máseleleri jónindegi keńeste bergen tapsyrmalaryn júzege asyrý úshin úkimet turǵyn úı-kommýnaldyq sharýashylyq salasyndaǵy problemalardy keńirek qarap, ýákiletti jáne jergilikti atqarýshy organdardyń qyzmetin odan ári jetildirý máselelerin sheshýge nazar aýdarýy tıis», - dedi E.Mamytbekov. Ol turǵyn úı jetispeýshiligin azaıtý, aımaqtyq erekshelikterdi eskere otyryp, otbasylardyń demografııalyq jaǵdaıy men turǵyn úı qory qurylymynyń sáıkessizdigin kezeń-kezeńimen joıý jáne qazirgi turǵyn úı qorynyń turǵyn úıdi tutyný sapasyna qoıylatyn talaptarǵa sáıkessizdigi máselelerin sheshý qajet dep esepteıdi.
Senatorlar zań jobasyn ázirleýshilerge aıtylǵan eskertýlerdi eskerýdi jáne ekinshi oqylymda qaraý kezinde túzetýler engizý qajettigin atap ótti.
