Aıta keteıik, Atyraýda mundaı megafestıval alǵash ret ótip tur. Festıval maqsaty - ulttyq ónerdi nasıhattaý, álemge qolónerdiń básekege qabilettiligin kórsetý.
Atyraýda Yrza Tursynzadanyń sharasy aıasynda kóp balaly, az qamtylǵan, jumyssyz áıelderge ulttyq qolóner boıynsha sheberlik synyptary ótti. Konkýrs qortyndysymen oblystyq ákimdiktiń qoldaýymen 25 úzdik qatysýshyǵa tigin mashınalary syıǵa berildi.
-7-8 balaly analardyń ulttyq qolónerdiń arqasynda óz eńbekterimen tabys taýyp otyrǵandarynyń kýási boldyq, olardyń kópshiligi mekenjaı áleýmettik kómegine de muqtaj emes. Qolóner kýrsynan ótken áıelder óz isterin ashyp jatyr, ýaqyt óte kele otbasylyq bıznesterine aınaldyrýda. Bul keremet. Birinshiden, olar ulttyq salt-dástúrdi saqtap, urpaqtaryna tabystaıdy, ekinshiden, tabys taýyp, joldastaryna kómektesedi, bul úlken eńbek. Osy oqý kýrstaryn uıymdastyrýǵa qoldaý kórsetken aımaq basshysy Nurlan Noǵaevqa alǵysymyz sheksiz,-dedi Premer-mınıstrdiń orynbasary Berdibek Saparbaev.
Festıval aıasynda ulttyq ónerdi qoldaıtyn áıel-kásipkerlerdi marapattaý saltanaty ótti. Erekshe kóringen qatysýshylarǵa estelik syılyqtar berildi.
-Men jeti balanyń anasymyn, ótken jyly Yrza Tursynzadanyń kýrsyn aıaqtap, tapsyryspen quraq kórpe tige bastadym. Qazir osy bastamam otbasylyq bızneske aınaldy, kelinim ekeýmiz shaǵyn seh ashtyq. Men MÁK-ke muqtaj emespin jáne osy arqyly tabys taýyp otyrǵanymdy maqtan etemin,-dedi Premer-mınıstrdiń orynbasaryna Isataı aýdanynyń turǵyny Janar Qadyrova.
Eske salsaq, «Kórpe Fest» megafestıvaliniń ashylýy Nur-Sultan qalasynda QR Premer-mınıstriniń orynbasary Berdibek Saparbaevtyń qatysýymen ótti. Festıval barlyq aımaqtarda uıymdastyrylady.
