Sportshylarǵa Almaty qalasynyń sport basqarmasynyń basshysy Rústem Baıseıitov pen «Almaty marafonynyń» negizin qalaýshy jáne qamqorshylyq keńestiń tóraǵasy Ǵalymjan Esenov sáttilik tiledi. «Spot sıqyrynyń kúshtiligi sonda, jyl saıyn sharaǵa qatysýshylardyń sany artyp keledi. Byltyr 3 500 adam qatyssa, bıyl 26 elden kelgen 5 myń sportshy qatysyp otyr. Júgirý trassasy AIMS halyqaralyq marafon qaýymdastyǵynyń erejelerine saı sertıfıkattaýdan ótti. Bul onyń sapaly ekenin rastap, álemdik standarttarǵa saı ekendigin bildiredi. Jartylaı marafon – qalanyń sporttyq ómiriniń ajyramas bóligi jáne «Almaty marafony» dástúriniń jalǵasýy», deıdi Ǵalymjan Esenov.
– Eki kún tóńireginde marafon men trıatlonnyń tarıhy jazyldy. Keshe ǵana Vena (Avstrııa) marafonynda (42.2 km) álemge áıgili júgirýshi Elıýd Kıpchoge álemdik rekordtyń ıegeri atandy. Búgin tańerteń bizdiń olımpıada chempıonymyz Aleksandr Vınokýrov Kona qalasynda (Gavaıı) ótken trıatlonnan álem chempıonatynda óziniń jas sanatynda jeńimpaz atandy. Bul batyldyqtyń, erik-jigerdiń jáne sporttyq jetistikterdiń keremet úlgisi,- deıdi Almaty jarty marafonynyń dırektory Saltanat Qazybaeva.
Márege birinshi bolyp 10 shaqyrym qashyqtyqqa júgirgen jeńimpazdar keldi. Amangos Iassaýı (32 mınýt 8 sekýnd) erler arasynda ózgelerdi ozsa, al Ekaterına Paramonova (37 mınýt 32 sekýnd) áıelder arasynda birinshi bolyp márege jetti.
Jartylaı marafonshylar arasynda qyzý jarys bastaldy. 21 shaqyrym qashyqtyqqa júgirýden almatylyq Mıhaıl Krasılov (1 saǵat 9 mınýt 15 sekýnd) jeńipaz atandy. Qyzdar arasynda Janna Mamajanova 1 saǵat 19 mınýt jáne 8 sekýnd ýaqyt kórsetkishimen birinshi bolyp keldi. Eń júırik erler men áıelder úshtigi 1,5 mıllıon teńge kóleminde aqshalaı júlde qoryn ózara bólisti. Júldegerler ár jas sanatynda da anyqtaldy.
Bıyl jartylaı marafon trassasynda medısınalyq kómekpen qamtamasyz etý jaǵy kúsheıtildi.
– Trassada jedel medısınalyq járdem brıgadalary, velosıped mingen medıkter, Qyzyl Jarty Aı Qoǵamynyń eriktileri jáne Qyzyl Jarty Aı Qoǵamynda jattyqqan Qazaq-Reseı Medısınalyq Ýnıversıtetiniń erikti stýdentteri kezekshilik etti. Tas jolda sonymen birge Cardios medısınalyq ortalyǵynyń dárigerleriniń shatyrlary ornatyldy. Eshkim aýyr jaraqattanǵan joq, al árbir kelýshige shuǵyl túrde kómek kórsetildi, dedi jarystyń bas dárigeri Orazbek Sahov.
Dúısenbi 14 qazan kúni toǵyzynshy Almaty marafonyna tirkeý ashylady. Jarys 2020 jyldyń 19 sáýirinde ótedi. 2019 jyly marafonǵa álemniń 53 elinen kelgen sportshylar qatysty.
ALMATY
