...rızashylyǵyn bildiredi
Alty redaktor, jeti jýrnalıske kóshe bar
Syr eliniń baıyrǵy basylymy – «Syr boıy» gazetiniń shyǵa bastaǵanyna bıyl 90 jyl toldy. Basylymda talaı aǵa býyn ókili basshylyq jasady. Sodan bolar Qyzylorda qalasynyń ortalyǵyndaǵy birneshe kóshe ár jyldarda «Syr boıy» basylymyna basshylyq jasaǵan redaktorlardyń esimimen atalady.
Gazet redaktorlary Uzaq Baǵaev, Zeınýlla Jarqynbaev, Qalqabaı Ábenov, Bazarbaı Sarbasov, Hamza Syzdyqov, Toıbazar Elemesovterge qalanyń bir-bir kóshesi berilgen. Ortalyqtaǵy kósheler boıymen júrgen jas urpaq ókilderi olarǵa taǵzym etip, eske alý dástúri qalyptasty.
Sondaı-aq basylymda qyzmet istegen jýrnalıster Myrqy Isaev, Jaqsylyq Bekhojaev, Ahmetjan Nurekeev, Orman Nurhabaev, Qurmanǵalı Ajarov, Jaqsylyq Túmenbaev, Qazı Danabaev atyndaǵy kósheler eskertkish sekildi elesteıdi. Al qaladaǵy aqyn Ábdilda Tájibaev, Asqar Toqmaǵanbetov, jazýshy Ǵabıt Músirepov, Aıtbaı Hangeldın, Zeınolla Shúkirov, Syrbaı Máýlenov, Sábıt Muqanov, Násireddın Serálıev esimderimen atalatyn kósheler qala sáýletine kórik berip tur desek jańylmaımyz.
Qaıyrbek MYRZAHMETULY
Qyzylorda
...úlgi tutady
Ashyq aspan astyndaǵy kitaphana
Aqtóbe qalalyq ortalyqtandyrylǵan kitaphana júıesi qala saıabaqtarynda kitap kórmeleri men býkkrossıngterdi ótkizýdi turaqty tájirıbege engize bastady. Atalǵan kitap kórmeleri negizinen týǵan jer men onyń tarıhyna qatysty taqyryptardy qamtıdy. Birden úsh jerden taza aýada kitap kórmesin uıymdastyrýdaǵy maqsat – qoǵam músheleriniń, sonyń ishinde balalardyń kitapqa degen qyzyǵýshylyqtaryn arttyrý.
Qazirgi zamanda «Býkkrossıng» qozǵalysy kitap pen oqyrmandar arasyn jaqyndatýdyń tıimdi joldarynyń biri bolyp tabylady. Bul sóz aǵylshyn tilinen aýdarǵanda «kitaptyń aınalysta júrýi» degen maǵynany bildiredi. «Býkkrossıng – óziń oqysań, ózgege tabys et» qaǵıdasyna negizdelgen kitap oqýǵa shaqyratyn qoǵamdyq qozǵalystardyń biri. Oǵan qatysýshylardyń sany kúnnen-kúnge kóbeıip keledi.
Qozǵalysqa qatysqysy keletin kez kelgen qala turǵyny ózi oqyp bitirgen bir kitabyn qoǵamdyq kópshilik oryndarǵa qoıyp kete alady. Keıin bul kitapty taýyp alǵan basqa adam oqıdy. Osyndaı tártippen atalǵan kitapty kóp oqyrman oqıtyn bolady.
Aınalasynan oqshaýlana túsken jas urpaqty rýhanııattyń sara jolyna salý bárimizdiń ortaq paryzymyz. Sondyqtan da qala turǵyndary saıabaqta uıymdastyrylǵan kitap kórmesin tamashalap, býkkrossıng qozǵalysyna kóbirek qatysqanyn qalaımyz. Ásirese jas býyndy búgingi ınternet zamanynda kitap oqýǵa qyzyqtyrýda bul tásildiń orny aıryqsha dep bilemiz.
Jarqyn SEITMAǴANBETOVA,
Aqtóbe qalalyq ortalyqtandyrylǵan
kitaphana júıesiniń ádiskeri
...usynys jasaıdy
Aqyn músinin kóbeıtip taratsaq deımiz
Týǵanyna 125 jyl tolǵan Sáken Seıfýllınniń rýhanı baılyǵymyzdyń «syr sandyǵynda» saf altyndaı saqtalatyn qundylyǵyn arttyra berý qasıetti paryzymyz. Asqaq aqynymyzdyń qyrýar eńbekterin zerdeleı qaıtalap oqyp, jadymyzda saqtap, qazaqı jurt bolyp ulttyq múddemizdi odan da bıik shyńdarǵa kóterý úlken maqsat. Osylardy aıta kele, taǵy bir jaǵdaıǵa kóńil bólýdi oryndy dep oılaımyn.
Meniń kitap sóremniń ústinde S.Seıfýllınge arnalyp quıylǵan kishirek qara temir músin tur. Osy músin keńes zamanynda jaqsy quıylǵan deýge bolady. Biraq qazir osy músindi esh jerden satyp alý múmkin emes. Qaıtalap quıyp satýǵa qoıylmaǵanǵa uqsaıdy. Meniń ózim ony antıkvarıat dúkeninen jyldam izdep áreń taýyp alǵan edim.
Aıtarym Sáken Seıfýllınge arnalǵan osy músin ultjandy ár qazaqtyń úıiniń tórinde turýy abyroı bolady degen oıdamyn. Ol úshin osy músindi nusqa retinde paıdalanyp, qaıtadan quıyp, keń taratý kerek. Usynys retinde, kelesi quıylatyn músinniń nusqasy aqsur metaldan bolsa óte tartymdy bolar edi. Osy usynys júzege asatyn bolsa, ardaqty aqynymyz Sáken Seıfýllınge kórsetken qurmetimizdiń taǵy bir eleýli belgisi bolar edi.
Naqypbek SÁDÝAQASOV,
zańger
Nur-Sultan
...ókinish bildiredi
Qanshama saýapty is istegen bolar edi!..
Qyzmet ornymyzǵa ájeptáýir bir kisi keldi, jasy 75-ke kelip qalǵan. Kókshetaýdaǵy bir kósheniń qazaqqa jat áldekimniń atynda ekenine qynjylyp maqala jazypty. О́zi gemotolog-dáriger, áıeli nevropatolog, jeke klınıkasy bar eken. Qan aýrýlary men nevrologııalyq aýrýlarǵa shaldyqqan naýqastar Qazaqstannyń túkpir-túkpirinen baryp emdeletin kórinedi. Aıtýynsha, emdeý ádisteri erekshe. Biraq ne shákirti joq, jasy bolsa kelip qalǵan. Demek, bar bilimi, qaterli aýrýlardy emdeý tásiliniń qyr-syry ózderimen ketedi degen sóz. «Kósheniń atyn árkim de aıtyp jatqan shyǵar. Odan da nege osy óz salańyz boıynsha birdeńe aıtyp, jazyp, ádis-tásilderińizdi taratpaısyz?» desem, «Ol meniń ashqan jańalyǵym, onyń qyr-syryn eshkimge aıtpaımyn. Talaı adam bilmek bolǵan. Bilse, óz atynan jarııalap jiberedi» deıdi. «Shynymen de keremet ádis, tyń tásil bolsa nege patent almadyńyz? Jańalyǵyńyzdy óz atyńyzdan tirketip, sosyn onyń ıgiligin búkil el kórse, eń abzaly sol emes pe edi?..» deımin. «Ony da kórdim kezinde. Eshkim jolatpady, eshkimge kerek emes. Al qazir jasym kelip qaldy, maǵan ondaı áýreniń keregi joq» deıdi... О́zi aldynda álemniń qansha elinde qansha ýaqyt demalǵanyn, qaıda qydyrǵanyn, balalarynyń shetelde bilim alǵanyn, birazy qazir sonda turyp jatqanyn aıtqan. «Siz muny emes, «mynandaı keremet jańalyq ashtym, ol qazir álemde, elimizde jappaı qoldanysqa enip, munshama nátıje berdi, mynandaı-mynandaı ortalyqtar ashyldy, bul tásildi munshama maman ıgerdi» dep maqtansańyz, áldeqaıda oryndy bolar edi...» dedim. Adamnyń kóńiline qaramaıyn demeısiń, biraq sózine qarasań, kúıip ketesiń... Mysaly, osy kisi óz kásibine baılanysty qajymaı-talmaı izdense, aıtatynyn aıtyp, jazatynyn jazyp, bilgenin úıretse jáne ony qyzǵanbasa, qanshama saýapty is istegen bolar edi!..
Roza QARAEVA
