Osy jańalyqpen Feısbýk áleýmettik jelisinde bólisken Aqtóbe oblysynyń ákimi Ońdasyn Orazalın: «Búgin arheologtardan aqjoltaı habar keldi. Temir aýdanynyń Tasqopa eldi mekeniniń mańynan b.z.d. V ǵasyrda altyn kıimmen jerlengen sarmat kóseminiń qorǵany tabyldy. Kezekti «Altyn kıimdi kóne eskertkish» – Aqtóbe óńiriniń ǵana emes, bútin qazaq eliniń tarıhynda erekshe oryn alatyn tarıhı qundylyq.
Keshegi Esik qalasynan, Shyǵys pen Atyraýdan tabylǵan kóne eskertkishterdiń jalǵasy búgin Aqtóbe jerinen de kórinis berdi. Bul degenimiz sol zamanda qazaq jerin mekendegen babalarymyz órkenıettiń joǵary satysynda ómir súrgendigin kórsetedi. «Bul qoınaýy qutty, tarıhy tereńde jatqan Aqtóbe óńirinen tabylǵan qundylyqtardyń bastamasy ǵana dep bilemin. Mundaı tarıhı jádigerler áli de kóptep tabylyp, dúnıe júziniń aldynda Qazaq eliniń mártebesin kóteredi dep senemin», dep jazdy.
Aıta keteıik, joǵaryda atalǵan aýmaqtaǵy qazba jumystaryn Á.Marǵulan atyndaǵy Arheologııa ınstıtýtynyń qyzmetkerleri júrgizgen. Qazba jumystary kezinde tabylǵan qabirdegi adamnyń kıimi altynmen jalatylǵan. Qabirde jylqy da kómilgen, onyń er-turman ábzelderi de baǵaly metalmen qaptalǵan.
