Músinshi Shoqan týyndylyry jurtqa kópten tanys. Tek óz elimizde ǵana emes, AQSh, Fransııa, Belgııa, Italııa, Shveısarııa, Ulybrıtanııa Aýstrııa murajaılary men kórnekti oryndarynda kórmelerin ótkizip, tyń týyndylarymen talaılardy tánti etkenin aıta ketelik. Belgili sheberdiń qolynan shyqqan músinderiniń bir ereksheligi – estetıkalyq talǵamǵa baı. Kóz salyp, kóńil toqtatqan ár adam ózi oı qorytyp, fılosofııalyq ıirimderine úńilýine múmkindik beretindiginde jatsa kerek.
Kórmeniń ashylý saltanatynda belgili óner qaıratkerleri, qalamgerler Shoqan shyǵarmashylyǵyna jan-jaqty toqtaldy. Onyń týyndylary negizinen qoladan, alıýmınııden, aǵashtan, mármár tastardan jasalǵan kameralyq jumystar ekenine de jete mán berdi. Ásirese ár músininde shyǵys pen eýropalyq mádenıet ushtasa kelip, ulttyq dúnıeniń altyn arqaýy saltanat quratynyn basa aıtyp jatty. Soǵan dálel retinde, asaý tolqynnyń ústinde qaıyqpen kele jatqan qazaqtyń úsh abyz qarııasynyń erekshe bolmysyn atap ótýge bolady. Aty aıtyp turǵandaı, bul – qazaq birliginiń aıqyn kórinisi ekendigin aıtqyzbaı uqtyrady. Sol sekildi, arǵy tarıhtan tamyr tartatyn «Tomırıs», «Saq jaýyngeri», «Atılla», ult óneriniń jaýhary sanalatyn «Sáýkele», «Qobyz», «Qarııa» syndy ózge de músinderin erekshe ataýǵa bolady. Ásirese qola, alıýmınıı, aǵash, tas qosyndylarynan jasalǵan «Kerbez Astana» músini jurtshylyqtyń erekshe iltıpatyna bólendi. Kórermenniń kóz jaýyn alǵan atalǵan kórme bir aı boıy elordalyqtar nazaryna usynylyp, odan keıin Almatyda jalǵasyn tabady.
Qasymjomart DÁÝLETULY
