Osyndaı sóz jazylǵan úlken, kósheniń jartysyn jaýyp turǵan bılbordtar ár aýylda da kózińe ottaı basylady. Túpki maǵynasy: «Avtoınspektorlarǵa para bermeńder degendi bildiredi-aý» – dep, túsinsem de, keıde, «avtoınspektorlarǵa sonda parany joldan shyǵyp berýge bola ma eken» degen oı kóńil túkpirimnen qylań ete qalady. Eriksiz jymııamyn. Bul kúletin sóz emes. Paraqorlyqty qaıtsek joıamyz degen áreket. Nıet túzý. Biraq eldi anyq para bermeýge shaqyrǵan tirkes dep aıtýǵa kelmeıdi.
Meniń qynjylatynym, sóz qory jaǵynan kóptegen halyqty artqa tastaı tura halyqty paraqorlyqqa qarsy shyǵýǵa bir kisideı shaqyratyn, jáne soǵan kópshilikti jumyldyratyn odan utymdy tirkes taba almaǵanymyz ba? Ishki ister bólimi qyzmetkerleri arasynda sózdiń parqy men narqyn tereń túsine alatyn adam joq degenge tipti de sengim kelmeıdi.
Ishki ister qyzmetkerleri degen bútin bir armııa desek te bolady. Olardyń arasynda tańdaılary taqyldaǵan talaı sheshender men taýyp sóıleıtin, bir aýyz sózimen sanańa kóp nárseni quıyp tastaıtyn sańlaq qyzmetkerler bar ekendigi sózsiz.
Bul jerde úgit-nasıhat jumystaryna jaýap beretin keıbir ishki ister qyzmetkerleriniń osyndaı bılbord ildirerde onyń maǵynasyna jan jaqty qaramaı, tapsyrmany asyǵys is júzine asyratyn tárizdi.
Úgit-nasıhat jumystary óte jaýapkershilikti qajet etedi. Adamdarǵa rýhanı qýat berýde, olardy alǵy maqsattarǵa jigerlendirýde taptyrmaıtyn qural. Tipti sanany múlde ózgertpese de kúrdeli áser etetinin fılosoftar men saıasatkerler jaqsy biledi. Osy máselege quqyq qorǵaý organdary da basa mán berse eken.
Marat QAShQYNBAEV,
jýrnalıst
Almaty oblysy,
Balqash aýdany,
Baqanas aýyly
