Qazaqstannyń eńbek sińirgen qaıratkeri, belgili músinshi Baqytjan Ábishevtiń shyǵarmashylyǵy mádenı qoǵam men kórermenderge jaqsy tanys. Qazaq halqynyń tarıhy, ultymyzdyń kórnekti qaıratkerleriniń taǵdyry músinshige etene jaqyn. Sýretshi ony óziniń basty taqyryby retinde sanaıdy. Ol uzaq jyl tarıhı tulǵalar men ulttyq batyrlardyń beınelerin qalpyna keltirýge úlken úles qosyp keledi.
Sýretshi Baqytjan Ábishevtiń el kóńilinen shyqqan músindik taqyryptary men sıýjetteri qazaq tarıhy men halyq ómiri jáne salt-dástúrimen tyǵyz baılanysty keledi. Avtordyń óz shyǵarmalaryn jasaýda ártúrli kompozısııalyq jáne kórkem plastıkalyq mánerli quraldar men ádisterdi paıdalanatynyn aıtý lázim. Músinshiniń júregine jaqyn, jylylyqqa toly «Ananyń portreti» shynaıy ómirden negiz alǵanyn baǵamdar edińiz. Keńdik pen plastıkalyq qýatqa toly «Kúıshi» beınesi, halqyn erlik isterge úndegen «Uran» eskertkishi jas urpaqty erlikke, ulylyqqa shaqyrǵandaı bolady. Al qazaq batyrlarynyń kúshi men eptiligi «Umaı», «Tomırıs», «Betashar», «Búrkitshi», «Batyr» beınelerinen jaqsy kórinis beredi.
Músinshini 1970 jyldan bastap stýdenttik, respýblıkalyq, halyqaralyq kórmelerdiń turaqty qatysýshysy, kórnekti monýmentaldyq jumystardyń avtory retinde bilemiz. Ol qazaq halqynyń batyrlaryna arnap qoıylǵan kóptegen ǵajaıyp eskertkishtiń avtory. B.Ábishev Almaty qalasynda Jambylǵa, Toqash Bokınge, Aqtóbede Álııa Moldaǵulovaǵa, Buqar jyraýǵa, Máshhúr-Júsip Kópeıulyna, Baıanaýylda S.Toraıǵyrovqa, Qaraǵandy qalasynda Sáken Seıfýllınge qoıylǵan eskertkishterdi músindese, sonymen qatar Almatydaǵy Ál-Farabı, Mahambet, Kúlásh Baıseıitova, jazýshy Ádı Sháripov, Nur-Sultan qalasyndaǵy Atatúrik, Jaıaý Musa turpattaryn beınelegen. Stanok janrynyń jańqalanǵan jumystary qazaqstandyq jáne sheteldik mýzeılerde erekshe baǵalanady. Búginde músinshi, sýretshi B.Ábishevtiń «Olımpıadashy» atty ózgeshe eńbegi Shveısarııanyń Lozanna qalasyndaǵy olımpıadalyq komıtettiń shtab-páterinde turǵanyn kóp adam bile bermeýi múmkin. Onyń sońǵy jyldary istegen iri týyndysy – IýNESKO sheńberinde atalyp ótken Mahambet О́temisulynyń 200 jyldyǵyna arnalǵan «Isataı men Mahambet» monýmentaldy kesheni deýge bolady.
Músinshi shyǵarmalary tas pen qola dáýiriniń oı sezimin shyǵarmashylyq jasampazdyqtyń uly ekpininde biriktire otyryp, máńgilikke shaqyrady. Salqar dalanyń syrnaıly únindeı ádemi bir áýen keletindeı dersiz. Áldeneni ańsap saǵynasyz.
ALMATY
