«Qazaqfılm» kınostýdııasy túsirgen týyndy festıvaldiń «Eýrazııalyq keńistik. HHI ǵasyr. Úzdik tolyqmetrajdy debıýt» atty baǵdarlamasynda kórsetilmek.
«Rıeltor» fılminde ótkeni de, bolashaǵy da bulyńǵyr Darık esimdi ómirden adasqan jigittiń taǵdyry týraly baıandalady. Birde ol óńi me, túsi me belgisiz bir jerde esin jıyp, oıanady. Tabıǵatpen betpe-bet ońasha qalǵan Darık aman qalý úshin qalada úırengen barlyq amal-tásilderin eske alýǵa májbúr bolady. Biraq munda, keń dalada, eń aldymen, ózińniń kishkentaı taıpańdy jınaý qajet...
«Máskeýlik tusaýkeser» festıvalin TMD Memleketaralyq gýmanıtarlyq yntymaqtastyq qory men «Eki Andreı» atty mádenıet jáne kınematografııany qoldaý qory uıymdastyrǵan. Festıvalge Ázirbaıjan, Armenııa, Belarýs, Qazaqstan, Qyrǵyzstan, Moldova, Reseı, О́zbekstan, Ýkraına, Tájikstan, Grýzııa, Lıtva, Latvııa jáne Estonııa syndy elderdiń kınogerleri qatysady. Festıval sheńberinde ár túrli formattaǵy 40 fılm kórsetilip, tanymal rejısser Kıra Mýratovanyń (1934 – 2018) eske alý keshi ótedi. Sonymen qatar, is-shara barysynda otandyq «Ine» fılminiń (rejısseri Rashıd Nuǵymanov) 30 jyldyǵyna oraı arnaıy kesh uıymdastyrylmaq.
Aıta ketsek, «Rıeltor» fılmi 2011 jyly Anapada ótken «Kınoshok» kınofestıvalinde qazylar alqasynyń arnaıy júldesine jáne Sankt-Peterborda ótken «Deboshırfılm – Chıstye grezy-XIV» halyqaralyq festıvalinde arnaıy júldege ıe boldy. Sondaı-aq Ádilhan Erjanovtyń fılmi «Kınolıkbez» (Barnaýl, Reseı, 2012) kınofestıvalinde bas júldege qol jetkizip, H «Sháken juldyzdary» festıvalinde «Úzdik tolyqmetrajdy fılm» júldesin aldy. Odan bólek bul kınotýyndy Seýlde ótken VI CINDI atty sandyq kıno festıvalinde White Chameleon Award júldesimen jáne «Úzdik debıýt» nomınasııasy boıynsha ulttyq «Qulager» júldesimen marapattalǵan bolatyn.
ALMATY
