Jol oqıǵasynan zardap shekken boıjetken aýyr hálde qalalyq aýrýhananyń jaraqat bólimine jetkizilgen. Dárigerlerdiń dıagnozy – bas súıek men oń buǵana synyǵy, bas-mı ashyq jaraqaty. Jaǵdaıy aýyr.
«Jol kólik oqıǵasyn jasaǵan polısııa aǵa leıtenanty R.Baımuqashevqa qatysty Qylmystyq kodekstiń 345-baby 2 bólimi boıynsha is qozǵalyp, sotqa deıingi tergeý jumystary bastaldy. Azamattardyń qaýipsizdigin qamtamasyz etýi tıis polısııa ókiliniń qyzmet kezinde mundaı oqıǵaǵa jol berýi – óte óreskel jaǵdaı. Sondyqtan qyzmet tártibin óreskel buzǵan qyzmetker tártiptik keńestiń sheshimimen ishki ister organdarynan shyǵaryldy. Sondaı-aq onyń tikeleı komandırleri men basshylary tártiptik jaýapkershilikke tartyldy» delingen Batys Qazaqstan oblystyq Polısııa departamenti taratqan baspasóz paraǵynda.
BQO polısııa departamentiniń bastyǵy general-maıor Mahsýdhan Áblázımov jol-kólik oqıǵasynan zardap shekken Larısa Beıisovanyń týǵan-týystarynan óz qyzmetkeri úshin keshirim surap, Larısanyń tezirek jazylyp ketýi úshin barynsha kómek kórsetiletinin habarlady.
Osy oqıǵany beınejazbaǵa túsirip, departament bastyǵynan ıntervıý almaq bolǵan bloger Aıbolat Bókenovke qatysty da ákimshilik is qozǵalǵany belgili boldy. A.Bókenov buǵan deıin de polısııa qyzmetkerleri tarapynan jasalǵan zań buzýshylyqtardy áshkerelep, beınejazba jarııalap júrgen tanymal tulǵa bolatyn. О́ziniń aıtýynsha, bir jyl ishinde 87 polısııa qyzmetkeriniń jol erejesin buzǵanyn vıdeoǵa túsirip, zań aldynda jaýap berýge májbúrlegen. Biraq polısııa A.Bókenovtiń de birneshe márte ákimshilik jaýapkershilikke tartylǵanyn, sońǵy oqıǵa bolatyn kezde de jeńil dárejede mas bolyp, polısııa qyzmetkerleriniń talabyna baǵynbaǵanyn habarlady.
2019 jyldyń basynan beri BQO Polısııa departamentiniń jeke quram boıynsha ınspeksııasy qyzmet tártibi buzylǵan 113 oqıǵany anyqtap, kinálilerdi ákimshilik jaýapkershilikke tartqan eken. Sonyń 60-y – jol erejesin buzý oqıǵasy. 5 qyzmetker ishki ister organdarynan shyǵarylǵan.
