Bedeli kún sanap artyp, mıllıondaǵan kórermen taǵatsyzdana kútetin ASA (Absolute Championship Akhmat) týrnıriniń buǵan deıin de Qazaqstanda bir márte jalaýy jelbiregen. Esterińizde bolar, 2017 jyldyń qyrkúıek aıynda ol Almatyda dúrkirep turyp ótti. О́kinishke qaraı, sol keshtiń basty jekpe-jekteriniń birinde qazaqtyń qaısar uly Arman Ospanov Brazılııanyń betkeustary Tıago Lýıs Bonıfasıo Sılvadaǵa ese jiberdi. Biraq osydan eki jyl buryn uıymdastyrylǵan sharamen salystyrǵanda, qazirgi jarystyń máni de, mańyzy da zor. О́ıtkeni aldaǵy týrnırde ASA nusqasy boıynsha qos birdeı altyn belbeý sarapqa salynady.
Jartylaı orta salmaqtyń (77,1 kılo) altyn belbeýi úshin Kabardıno-Balkarııanyń ókili Albert Túmenov (21-4-0) pen Cheshenstannyń óreni Beslan Ýshýkov (17-3-0) aıqasady. Al orta salmaq dárejesindegi (83,9 kılo) chempıondyq táj úshin tartys Ichkerııanyń taǵy bir sańlaǵy Salamý Abdýrahmanov (12-1-0) pen Máskeýdiń myqtysy Valerıı Mıasnıkov (14-1-2) arasynda ótedi.
– ASA-nyń qurylǵanyna asa kóp ýaqyt bola qoıǵan joq. Desek te qysqa ǵana merzim aralyǵynda olar zor bedel jıyp úlgerdi. Búgingi tańda aıtýly uıym TMD aýmaǵynda teńdessiz dep tanylyp, kúlli álem boıynsha úzdik bestiktiń sanatynda. Sebebi ASA jıi-jıi jarystar ótkizedi, ár sharany asa joǵary deńgeıde uıymdastyrady, qataryna kil myqty sportshylardy jıǵan, bapkerleri bilikti, tóreshileri saýatty jáne de beriletin syıaqylary da qomaqty. Qazirgi kezde bul komponentter de sporttyq saıystardyń bedelin arttyrý úshin asa mańyzdy. Sol sebepti bizder ASA-men tyǵyz qarym-qatynas ornatýdy o bastan kózdedik. Nátıjesin ózderińiz kórip otyrsyzdar. Irgetasy Almatyda qalanǵan «Alash Praıdtyń» aıtýly uıymmen qoıan-qoltyq aralasyp, júıeli túrde jumys júrgizip kele jatqanyna bes jyldan asa ýaqyt boldy. Búgingi tańda ASA-nyń muryndyq bolýymen ótken jarystarǵa Qazaqstannyń sportshylary úzdiksiz qatysyp keledi. Sonyń arqasynda keıbir órenderimizdiń dańqy biraz jerge jaıyldy. Ara-tura bizdiń elde de dúbirli dodalar ótip turady. Aldaǵy ýaqytta da sol iskerlik baılanysty úzbeı, odan ári damytýǵa tıispiz. Al bizdiń kózdegen negizgi maqsatymyz – osy sport túrin serik etken qazaq jastaryn halyqaralyq arenaǵa kóptep shyǵaryp, olardyń ádemdik deńgeıdegi dodalarda tanylýyna barynsha úles qosý.
Almatyda ótetin jarysta joǵaryda aıtylǵan tıtýldyq qos básekeden bólek, taǵy 14 jekpe-jek ótkizý josparlanyp otyr. Aralaryndaǵy eń mańyzdylaryna toqtalsaq, tájirıbeli Ermek Tlaýov (70,3 kılo) áıgili Vener Galıevpen kúsh synasady. Jaýyngerlik sambodan álemniń eki dúrkin chempıony degen dardaı ataǵy bar Bashqurtstannyń týmasy erejesiz jekpe-jek ónerinde de tolaǵaı tabystarǵa qol jetkizdi. Galıevtiń barlyq jetistikterin tizbektemeı-aq, kezinde onyń Aleksandr Shlemenko men Maırbek Taısýmov syndy ataqtarynan at úrketin sańlaqtarǵa san soqtyrǵanyn aıtsaq ta jetkilikti.
«Metıs» degen laqap atpen tanymal Evgenıı Egemberdıev (93 kılo) Ispanııanyń alyby Danıel Toledomen judyryqtassa, qazaq kúresiniń qyr-syryna qanyqqan Nursultan Qasymhanov (66 kılo) Brazılııanyń djý-djıtsý sheberi Aýgýsto Mendespen aıqasady. Sol sekildi Shahmaral Jetpisov (+93 kılo), Goıtı Dazaev (77,1 kılo), Fanıl Rafıkov (66 kılo) jáne taǵy basqa jerlesterimiz shet memleketterden kelgen saqa sportshylarmen saıysqa túsedi. Ne kerek, aldaǵy 29 qarashada Almaty tórinde taǵy bir dýly doda álem nazaryn ózine jalt qarataıyn dep tur.
ALMATY
