Rýhanııat • 20 Qarasha, 2019

Túrkistan: Jyr jattaǵan oqýshy mıllıon teńge utty

Túrkistanda jas jyrshylardyń alǵyrlyǵy men bilimdiligin anyqtaıtyn «Jaqsylar, dastan aıtaıyn...» baıqaýy ótti. Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamasyn júzege asyrý aıasynda ótken baıqaýdyń maqsaty – balalar arasynda kitap oqýdy jáne qazaq halqynyń batyrlyq epostaryn nasıhattaý, qazaq halqynyń rýhanı asyl murasyna degen súıispenshilikke jáne patrıotızmge tárbıeleý, eldik pen erlik rýhyn, namysqoı, qaısarlyq qasıetterge baýlý.

Ǵalymjan ELShIBAI

Baıqaý Túrkistan oblystyq Qoǵamdyq damý basqarmasynyń qoldaýymen, "Ońtústik Qazaqstan" gazetiniń uıymdastyrýymen úshinshi ret ótip otyr. Ashylý saltanatynda sóz alǵan oblys ákiminiń orynbasary Sáken Qalqamanov bul is-sharanyń rýhanııat úshin asa mańyzdy joba ekendigin aıtyp, qatysýshylarǵa sáttilik tiledi.

Aldyńǵy jyldary oqýshylar «Qambar batyr», «Alpamys batyr» jyrlaryn jatqa aıtýdan synǵa tússe, bıylǵy baıqaý «Qobylandy batyr» jyryna arnaldy. Baıqaýdyń alǵashqy kezeńinde batyrlar jyryn jatqa aıtýdan súrinbeı ótken úmitkerler ekinshi kezeńde ádebıet, rýhanııat taqyryby boıynsha suraqtarǵa jaýap berip, baq synady. Eki kezeńde de eń joǵary upaı jınaǵan talanttar sheshýshi synda «Qobylandy batyr» jyryndaǵy kónergen sózderdiń maǵynasyn ashý boıynsha qazylardyń suraqtaryna jaýap berdi. Sóıtip, barmaqtaı baq pen taýdaı talap básekege túsken baıqaýda shyn júırikter tórge shyqty.

Túrkistan oblysynyń 16 aýdan, qalasynan iriktelgen 47 jyrsúıer bala «Qobylandy batyr» jyryn bastan-aıaq, tolyq jatqa aıtýdan saıysqa túsken baıqaýda Sozaq aýdanynyń týmasy О́ser Turan birinshi orynǵa ıe boldy. Jeńimpazǵa 1 mln teńge jáne ony daıyndaǵan ustazy Asylzat Ámetovaǵa 2 mln teńge qarjylaı syılyq sertıfıkatyn oblys ákiminiń orynbasary S.Qalqamanov pen «Ońtústik Qazaqstan» gazetiniń bas redaktory Abaı Balajan tabys etti. Ekinshi oryndy ıelengen Sozaq aýdanynyń úmitkeri Rábııa Shaltaıǵa 600 myń teńge, ustazy Jazıra Sánkibaevaǵa 1 mln 200 myń teńge berildi. Júldeli úshinshi oryn ıegeri Tólebı aýdanynan qatysqan Nursultan Turmahanǵa 300 myń teńge, ustazy Lázzat Sándibaevaǵa 600 myń teńge aqshalaı syıaqy tabystaldy.

Aıta ketelik, bul baıqaý eń alǵash ret 2017 jyly uıymdastyrylyp, sodan beri respýblıka kóleminde keńinen qoldaý taýyp, óńirlerde ótkizilip keledi.

Túrkistan oblysy