Dálirek aıtsaq, «Qazaq ataýyn qaıtaryp, egemendikti súıinshilegen...», «Úlken joldyń úzikteri», «Tarhan tekti redaktor», «Egemen» esten shyqpaıdy», «Jaqsy dástúr jalǵasa beredi», «Ushqyr oılar ushqyndary», «Jazyqsyz jazalanǵan jýrnalıster» maqalalarymen birge gazet ardageri, aqyn Qorǵanbek Amanjoldyń «Júz jyl» poema-tolǵanysy jaryq kórdi.
«Sırek sýretter sóıleıdi» ataýymen berilgen on úshinshi bette gazettiń ár kezeńdegi tarıhy tańbalanǵan. Amangeldi Qııas «Taralym hám qaralym» maqalasynda gazettiń ár on jyldyqtaǵy taralym kórsetkishin tarazylaıdy.
Gazettiń sońǵy betinde jýrnalıst Beken Qaıratuly «Eńbekshi qazaq» gazetiniń 1927 jylǵy 27 qarasha kúngi №272 sanynda jarııalanǵan «Bir sýrettiń syryna» úńilse, ǵalym-jazýshy Qoıshyǵara Salǵarauly basylym jaıly esteligimen bólisip, «Egemen Qazaqstan» azamattyq ustanymymdy qalyptastyrdy deıdi.
Týyn tigip, Astana – jer ortaǵa,
Əz shańyraq!
Hosh keldiń Saryarqaǵa!
Arý qalam – aıaýly Almatymnyń
Ala kelgin rýhyn jańa ortaǵa, - degen belgili qalamger, «Egemende» eńbek etken Erbol Shaımerdenulynyń da «Egemen Qazaqstan» Astanaǵa kóship kelgende» óleńi sońǵy bettiń salmaǵyn arttyrdy.
Merekelik sanǵa jasaǵan sholýymyz da mejesine jetti. Taǵylymdy basylymnyń tamyr-tarıhyna tereń boılaǵyńyz kelse, gazettiń 21 qarashadaǵy sanyn nemese egemen.kz saıtyn oqı júrińizder.
