Osyǵan oraı jýyrda Mádenıet jáne sport mınıstrligi jáne «Kazakh Tourism UK» muryndyq bolýymen «Býrabaı» kýrorttyq aımaǵynda BAQ ókilderine arnalǵan arnaıy baspasóz týry uıymdastyryldy. Is-shara barysynda jýrnalısterge elimizdiń tumsa tabıǵatynyń sulýlyǵyn, tarıhyn, halqymyzdyń qonaqjaılyǵy men ulttyq dástúrinen syr shertetin kóp serııaly Kórikti Qazaqstan fılmi kórsetildi. Dál osy beınerolık aldaǵy ýaqytta «Álem arýy» baıqaýynda sheteldikterdiń nazaryna usynylady.
Fılmniń túsirilimi barysynda Mádına «Qazaq arýy» retinde elimizdiń birqatar kórikti jerlerin aralap shyqqan. Atap aıtar bolsaq, Mańǵyshlaq túbegindegi qııal ǵajaıypqa toly Bozjyra shatqaly, Ile Alataýy bókterindegi álemge áıgili Shymbulaq taý-shańǵy kýrorty, Sharyn shatqaly, Qaıyńdy kóli men ortaǵasyrlyq sáýlet óneriniń jaýhary – Saýran qalasy, «Assy» ústirtindegi álemge áıgili observatorııa, Túrkistan qalasyndaǵy Qoja Ahmet Iаsaýı kesenesi, qupııaǵa toly Aqmeshit úńgiri, tynyshtyqtyń sheksiz kórinisi – Kaspıı teńizi, sondaı-aq ýltrazamanaýı shahar, el astanasy Nur-Sultandy aralap shyqty.
Keıipkerimizdiń aıtýynsha, túsirilim ekstremaldy rejımde ótip, ómirge qaýip tóndiretin sátter de bolypty. Máselen, Mádına Býtakov shatqalynda ústine salmaǵy 20 kılo tartatyn kıimmen atqa minip taý betkeıine kóterilgen. Sondaı-aq belsendi týrızmniń bir túri sanalatyn raftıngshiler komandasymen birge Túrgen ózeniniń qatty aǵysyna tótep berýine týra kelgen.
14 jeltoqsanda Londonda ótetin «Álem arýy» halyqaralyq baıqaýynda Mádına Batys Qazaqstan óńiriniń namysyn qorǵap, Kórikti Qazaqstan jobasyn tanystyrady. «Álem arýy» baıqaýynyń alańyn tıimdi paıdalanyp, Qazaqstannyń ózge elder arasynda tanymaldylyǵyn arttyrýǵa bolady. Sebebi «Álem arýyn» sol kúni 200 elden 2,8 mıllıardtan astam adam tamashalaıdy dep boljanýda.
