Foto: kazchess.kz
B.Asaýbaeva 13 partııada 7,5 upaı jınap, 4 ret jeńiske jetti, 7 oıyndy teń aıaqtap, 2 partııada jeńildi. Osy nátıje oǵan Elo reıtınginde 19,1 upaı qosyp, mansabyndaǵy eń jarqyn kórsetkishterdiń birine aınaldy. Ásirese týrnırdi bolashaq chempıondy jeńýden bastap, sońǵy kezeńde de joǵary deńgeıde aıaqtaýy Qazaqstan shahmatshysynyń turaqty oıynyn aıqyn kórsetti.
Aıta keteıik, Bıbisara jarystyń alǵashqy týrynda qarsylasynan basym tústi. Bul onyń týrnır boıy kóshbasshylarmen teń dárejede kúrese alǵanyn ańǵartty. Blısten 3 dúrkin álem chempıony úshin bul týrnır álem chempıondyǵyna úmitkerler arasyndaǵy básekege daıyndyqtyń mańyzdy bóligi ispetti, atalǵan týrnır 29 naýryz − 15 sáýir aralyǵynda Kıprdiń Pafos qalasynda ótedi.
Tata Steel Challengers 2026 týrnıriniń jeńimpazy 15 jastaǵy amerıkalyq grossmeıster Endı Výdvord bolyp, 10 upaı jınady. Ekinshi oryndy ýkraınalyq Vasılıı Ivanchýk (9,5 upaı), al úshinshi oryndy ázerbaıjandyq Aıdyn Súleımanly (9 upaı) ıelendi. Týrnırge qatysýshylardyń ortasha reıtıngi 2544 Elo upaıyn qurap, jarys XII kategorııaǵa sáıkes keldi.
Veık-an-Zeedegi bul nátıje Bıbisara Asaýbaevanyń tájirıbeli grossmeısterlermen teń dárejede básekege túse alatynyn taǵy bir márte aıǵaqtady jáne aldaǵy maýsymdaǵy eń mańyzdy jarystardyń biri qarsańyndaǵy sporttyq babyn aıqyn kórsetetin mańyzdy kórsetkishke aınaldy.
Eske salaıyq, buǵan deıin Bıbisara Asaýbaeva blıs shahmatynan úshinshi ret álem chempıony atanyp, fınalda ýkraınalyq Anna Mýzychýkty utqan edi.
