Atalǵan uıym elimizdegi pikirsaıys qozǵalysyn jandandyrýǵa, barlyq pikirsaıys uıymdaryn biriktirýge, týrnırlerdi uıymdastyrýǵa, halyqaralyq jarystarǵa qatysý úshin jas pikirsaıysshylardy daıyndaýǵa baǵyttalǵan.
«Qazaq halqy árdaıym aqyndarǵa, jyrshy termeshilerge baı bolǵan el. О́skeleń urpaqtyń qanyńda da bul óner bar. Pikirsaıys bul tek sóz túsindirý, sóz talastyrý ǵana emes, sonymen qatar ómirlik jolyn tańdaýǵa úlken járdem beretin mektep. Menińshe, federasııa bolashaqta kóptegen jastarǵa ómirlik jolyn taýyp, kásibı maman retinde qalyptasýyna kómektesedi», - dedi «Qazaqstan Pikirsaıys federasııasynyń» prezıdenti Bolat Buharbaı.
Sondaı-aq brıfıng aıasynda pikirsaıysshylardyń kommýnıkasııasyna arnalǵan saıt jáne mobıldi qosymsha tanystyryldy.
Qosymshanyń ereksheligi - ýaqyt ólsheıtin taımkıper fýnksııasyn atqarýy. Aıta ketý kerek, saıt pen qosymshanyń balamasy bizdiń elde joq.
Sonymen qatar brıfıng barysynda «Jastar Alany 2019» respýblıkalyq pikirsaıys týrnıriniń nátıjeleri tanystyryldy. Úzdik pikirsaıysshy ataǵyna 18-29 jas aralyǵyndaǵy 120-dan astam jas sóz sheberleri baq synasty.
Jalpy júlde qory 4 000 000 teńgeni quraǵan. Týrnırdiń fınaldyq oıyndary uzaq aralyqtan keıin alǵash ret kógildir ekrannan kórsetildi. Ataqty blogerler, vaınerler, jýrnalıster men qoǵam qaıratkerlerdiń qatysýymen «Stars Game» oıyny kórermenderge tosyn syı boldy.
«Bıyl biz Aqparat jáne qoǵamdyq damý mınıstrliginiń qoldaýymen, «Azamattyq bastamalardy qoldaý ortalyǵy» KEAQ-men birlesip «Jastar Alany 2019» respýblıkalyq pikirsaıys týrnırin ótkizdik. Bul oqıǵa eldiń pikirsaıys qaýymdastyǵy arasynda erekshe qyzyǵýshylyq týdyrdy. Alǵashqy kezeńde 133 fraksııadan ótinim tústi. Komıssııa sheshimimen 60 fraksııa bizdiń týrnırdiń fınalyna qatysty. Sondaı-aq týrnır aıasynda oıynshylar men tóreshilerge turaqty túrde semınar men trenıngter ótkizdik. Olardyń qorytyndysy boıynsha qatysýshylar sertıfıkattar alyp, osyndaı trenıngterdi óz óńirinde ótkizýge múmkindik aldy», - dedi Jas Otan jastar qanatynyń tóraǵasy Dáýlet Káribek.
