Búgingi tańda brazılııalyq djıý-djıtsý qarqyndy damyp kele jatqan sport túrleriniń biri. Sonaý XVI ǵasyrda Japonııadan bastaý alǵan aıtýly óner qazirgi kezde qanatyn qulashtap jaıyp, kúlli álemge keńinen tarady. Al irgetasy Kún Shyǵys elinde qalanǵan sport túrine Brazılııanyń mamandary kóptegen ózgerister engizip, jańa bıikke kóterdi. Biz de sol baǵytty ustanyp, osy ónerdi óz memleketimizde órkendetý úshin barynsha kúsh salyp jatyrmyz. Sol sekildi qazirgi kezde grepplıngtiń de damý barysy qýantady deıdi Qazaqstan Respýblıkasy brazılııalyq djıý-djıtsý men grepplıng federasııasynyń vıse-prezıdenti Aqmaral Qanatbaeva.
Iá, sońǵy jyldary osy sport túrlerin serik etken Qazaqstannyń órenderi halyqaralyq arenada eleýli tabystarǵa qol jetkizip júrgeni barshaǵa málim. Búgingi tańda Osmanjan Qasymov, Darhan Nortaev, Islam Mamılov, Narıman Myńbaev, Ernaz Musabek, Mansur Habıbolla, Azamat Baqytov, Anton Amanbaev, Rýslan Israılov, Omar Mannarov, Móldir Mekenbaeva, Marııam Ordabaeva, Aıda Qurbanova jáne taǵy basqa has sheberlerdiń esimderi kópshilikke jaqsy tanys. Olardyń aldy álemdik deńgeıdegi dodalarda daralansa, ózgeleri qurlyqtyq jarystarda jasyndaı jarqyrap júr. Jerlesterimizdiń osyndaı orasan zor tabysyna barsha qazaqstandyq jankúıer erekshe shattanýda.
Al sońǵy jyldardaǵy kórsetkishterine toqtalatyn bolsaq, jýyrda ǵana Birikken Arabtar ámirliginiń (BAÁ) astanasy – Ábý-Dabıde uıymdastyrylǵan halyqaralyq týrnırde otandastarymyzdyń tamasha óner kórsetip, komandalyq esepte ekinshi oryndy oljalady. Al osydan birer aı buryn Japonııanyń ashyq chempıonatyna qatysqan Qazaqstannyń órenderi sol sapardan bir kúmis jáne bir qola júldemen oraldy.
Sonymen qatar brazılııalyq djıý-djıtsý men grepplıng sheberleri túrli qaıyrymdylyq is-sharadan da qalys qalyp júrgen joq. Bir ǵana mysal, aıtýly federasııanyń qamqorlyǵynyń arqasynda Almaty qalasy men Almaty oblysynda ornalasqan qos birdeı balalar úıinde osy sport túrine beıimdelgen arnaıy zal ashylyp, qajetti qural-jabdyqtarmen qamtymasyz etildi. Jas jetkinshekterdiń sheberlikterin shyńdaý maqsatynda olarǵa bilikti bapkerler bekitildi. Bul kúnderi balalar úıiniń bir top uldary men qyzdary sol úıirmelerde tegin daıarlanýda.
Almaty qalasy ákimdiginiń qoldaýymen uıymdastyrylyp otyrǵan týrnırdiń ózine toqtalatyn bolsaq, alǵashqy kúni 4-17 jas aralyǵyndaǵy balalar men jasóspirimder óner kórsetedi. Kelesi táýlikte eresekter men ardagerlerdiń jekpe-jekterin tamashalaımyz. Al eń sońǵy kúni kásipqoı sportshylar jarys kórigin qyzdyrady.
