Ortalyqtyń ashylý saltanatynda Túrkııadan kelgen mártebeli meıman Nejmettın Erdoǵan Bilál Túrkııa Prezıdenti Rejep Taıyp Erdoǵannyń sálemin jetkizdi. «Biz Atajurttaǵy aǵaıynnyń qýanyshyna qashan da ortaqpyz. Barshańyzdy meshittiń ashylýymen quttyqtaımyn. Alla Taǵala baýyrlas qazaq halqyna jaqsylyǵyn jaýdyrsyn», delingen Túrkııa Prezıdentiniń quttyqtaýynda. Al Sheshenstan Respýblıkasynyń basshysy Ramzan Qadyrovtyń quttyqtaýyn keńesshisi Amrýddın Edılgerev oqyp berdi. Sondaı-aq Túrkistan oblysynyń ákimi О́mirzaq Shókeev musylman qaýymdy, onyń ishinde Saryaǵash qalasynyń turǵyndaryn ıslam ortalyǵynyń ashylýymen quttyqtap, ıgi tilegin joldady. «Ǵulamalardyń aıtýynsha, ómir tórt taǵannan turady: ǵalymnyń nasıhaty, patshanyń ádildigi, baıdyń jomarttyǵy, halyqtyń duǵa-tilegi. Osy tórt taǵan ózindik kórkem úılesimin tapqanda ǵana kez kelgen qoǵam baqytty bolady», - dedi oblys ákimi О́mirzaq Shókeev. Izgi tilekterin О́zbekstan múftıi Osmanhan qajy Álimov pen Qyrǵyzstan múftıi Maqsatbek qajy Toqtamýshov ta bildirdi. Al elimizdiń bas múftı Serikbaı qajy Oraz árbir adam ómirinde meshittiń alar orny týraly nasıhat aıtty. «Bizdiń ómirimiz meshitpen baılanysty. Adamnyń júregi qulshylyq úıinde jaı tabady. Onda qanshama ýaqytymyzdy qulshylyqpen ótkizemiz. Baýyrdy bir-birimen qaýyshtyryp, ózara ımandasatyn mekenimiz – meshit. Eldiń ıgiligi úshin jasalatyn qaıyrymdylyq pen izgi ister de Allanyń úıinde júzege asady. Jabyrqaǵan jannyń meıirimge bólenetin mekeni de – meshit. Sábı dúnıege kelgen sátte oǵan azan shaqyrylyp, at qoıylady. Ol meshitte tálim alyp, er jetkende nekesi qıylady. Otbasylyq ómirde kezdesetin túrli synaqtar men saýaldardyń jaýaby hám pátýasy osy meshit pen ımamnyń aralasýymen júzege asady. Sondyqtan, meshit salý - saýaby mol saýapty is», – dedi Serikbaı qajy Oraz. Sondaı-aq bas múftı shetelden kelgen qonaqtarǵa alǵys aıtyp, ıslam ortalyǵyn salyp bergen azamattarǵa jyly lebizin bildirdi.
