Barlybek Syrttanuly 1866-1914 jyldar aralyǵynda ómir súrgen qazaq oqyǵany. 1890 jyly Sankt-Peterbordaǵy Imperatorlyq ýnıversıtetti úzdik bitirgen, 9 tildi emin-erkin meńgergen bilimdi, erýdıt azamat. Alash qozǵalysynyń Ortalyq tulǵasy retinde azattyq ıdeıasyn taratqan, patshalyq úkimetke qarsy kúres uıymdastyrǵan reformator. 1911 jyldyń 13 maýsymynda Á. Bókeıhannyń tapsyrmasymen 4 bólim, 28 baptan ǵana turatyn «Qazaq eliniń Ýstavy» konstıtýsııalyq eńbegin jazǵan. Almaty qalasynan I Musylmandar kitaphanasyn, emhanasyn, mektebin ashqan halyq perzenti. 1914 jyldyń 26 qarashasynda Jetisý oblysynyń áskerı gýbernatory M. Folbaýmnyń buıryǵymen atý jazasyna kesilgen. 48 jasynda qaza tapqan qaıratker «Yntymaq erejesi», «Dárilik ósimdikter», «Qazaqtardyń ómirin jaqsartý týraly» t.b. eńbekterdiń avtory.
Kitapty qurastyryp, alǵysózi men túsinigin jazǵan belgili jas jazýshy, tulǵa murasyn zertteýshi, QR «Daryn» memlekettik jastar syılyǵynyń laýreaty Eldos Toqtarbaı. Kitaptyń birinshi bólimine Barlybek Syrttanulynyń ómir jolyna, qoǵamdyq-saıası qyzmetine qatysty Máskeý, Peterbor, Tashkent, Omby arhıvterinen tabylǵan tarıhı qujattar men materıaldar toptastyrylǵan. Kitaptyń «Barlybektaný máseleleri» degen ekinshi bólimine ár jyldary jazylǵan tulǵa týraly ǵalymdardyń maqalalary men zertteýleri engen. Kitaptyń jalpy redaksııasyn QR UǴA akademıgi, f.ǵ.d., professor D. Qamzabekuly basqarǵan. Kitapqa z.ǵ.d., professor N. Dýlatbekov, t.ǵ.d., professor O. Muhatova, f.ǵ.d., professor S. Jumaǵul syndy ǵalymdar pikir jazǵan. Bul kitap Barlybek Syrttanulyn tanımyn, zertteımin degen nıeti bar jastarǵa oı salyp, mol derek beredi.
