Jyr dodasyna Nur-Sultan, Semeı, Qaraǵandy, Kereký óńirimen qatar, kókshetaýlyq 25 jas aqyn qatysyp, jaqut jyrlaryn tyńdarman qaýymǵa tartý etti. Aqyndardyń shama-sharqyn, shabysyn synaý maqsatynda erkin taqyrypta jazylǵan óleńderin de qazylar alqasy saralap, júzden júırigin anyqtady. Irikteýden irkilmeı ótken aqyndardyń óleń shýmaqtarynan eline, jerine degen súıispenshilik lebi esedi. Biri táýelsizdikti tartý etken qurbandardyń erligin jyrlasa, endi biri ózderin baqytty eldiń urpaqtary ekendigin óleńderimen órnektedi.
– Osy músháıraǵa ózimniń Táýelsizdik týraly óleńimdi alyp keldim. Únemi qalmaı, qatysyp júremin. Osy bir jaqsy úrdis ádemi qalyptasyp keledi, – deıdi jas aqyn Baqytbek Jaqsygeldi.
Mundaı músháıralar aqyndarǵa tyń serpilis, aıqyn baǵyt beredi. Baıqaý qorytyndysy boıynsha bas júldeni M.Jumabaev atyndaǵy oblystyq ǵylymı-ámbebap kitaphanasynyń qyzmetkeri Oralbek Núrish jeńip aldy. Birinshi orynǵa Ortalyq Qazaqstan akademııasynyń stýdenti Asemgúl Serikbol, ekinshi orynǵa Nur-Sultan qalasynan kelgen Abylaı Máýlen men qyzyljarlyq Abylaıhan Áshimhan laıyqty dep tanylsa, Semeı qalasynyń atynan báıgege túsken Elaman Ospan jáne Kóken Shákeev atyndaǵy aqyndar mektebiniń shákirti Qarashash Uǵylan júldeli úshinshi oryndy qanaǵat tutty. Barlyq qatysýshyǵa Alǵys hattar men estelik syılyqtar tabystaldy.
